寒冬中…

今日真係好有97個種味道，雖然唔關我事，不過身邊朋友損手，社會經濟轉差，都覺得唔開心！
十一月可能有個意想不到反彈(希望啦)，到時坊間財演又會話見底、抵買！有貨的朋友可以想想呢個係唔係趁高減持的最後機會！

同步過冬

近日市場只能用慘不忍睹形容，年初所講的諸神的黃昏終於出現，其實我今年亦犯左幾次可以致命的錯誤，不過幸而及時紏正，但身家都唔見左兩成，不過已比好多投資者好，仍然可執行原本擬定的”冬眠+執骨” 計劃，但將來買貨的本錢當然就少了，但仍然在可以接受水平，在保本大前題下，都會唸辦法揾下錢！不過見身邊親人朋友在外匯同股票市場損手，自己卻愛莫能助，始終不是味道！

其實近呢幾個月不停見有人大打價值投資旗號去”低位” 買貨，我之前已指出唔可以用PE做指標，因為呢種時勢，今年唔知明年咩環境，PE根本上係廢指標，股息率亦唔可靠，原因同上。股票同做生意打工一樣，唔係認為正確就可以生存，係需要考慮環境，無網絡就係一個好例子，可必因為正確(某公式計出超值)而去買！我只能憑經驗講港股現價仍未真正見低，亦無邊隻實力股值得”執骨”！ 股市唔係一個只用數學就可以生存的地方，否則所有會計師同大學教授都唔會輸錢，假如有經歷97與2000的股民應該明白我所指何物！

我唔係話現價入市長揸係自取滅亡，不過熊市第一要條就係保本，做好友只要行錯半步就會粉身碎骨，與其冒險獲取最大利潤，不如放棄部份利潤，換取一個較安全的入市位！呢個牛市，我係牛二先開始入場，回報亦相當可觀！誰可以留著本錢捱過呢個漫長的冬天，誰就是最後勝利者！

當”股票” 好像從世上消失，個時先係最安全全力入貨時機，我從未見過一次股災會結束於仲有一大班人積極撈底作”價值投資”的時候。呢場係百年一見金融災難，但危永遠帶著機，處理得宜，亦係一個大到可以退休的機遇！