火燒連環船

*以上純粹個人亂吹分析，你信我就係你自己問題

星期日有D野!

今日上討論區，發現此文章

http://www.discuss.com.hk/viewthread.php?tid=5930707&page=1#pid121050709

內容竟係抄自我"天涯孤客"一文，唔知係邊位知音人！

原來無線將原本時段買左俾Sam Hui宣傳兩星期，但要來的總會來…

大時代第三十四集

*以上純粹個人亂吹分析，你信我就係你自己問題

20-Nov-2007.....817 again?

「 對 方 的 預 測 正 確 嗎 ？ 願 望 可 以 實 現 嗎 ？ 唯 有 讓 其 產 生 這 種 錯 覺 ， 陷 阱 的 成 功 率 才 會 高 。 一 定 要 記 得 在 陷 阱 上 放 置 金 幣 。 」

「 讓 敵 人 產 生 錯 覺 ， 以 為 自 己 的 希 望 似 乎 可 以 實 現 。 然 後 再 從 心 理 上 加 壓 ， 同 時 必 須 是 在 敵 方 不 察 覺 的 情 況 下 讓 他 們 覺 得 已 經 沒 有 第 二 種 選 擇 了 。 」

--- 楊元帥 銀河英雄傳說

天涯孤客

經過上期秋官加欣兒勁歌熱舞大唱天涯孤客，個個股民手持正股呢兩個星期仲慘過天涯孤客！ 回首家鄉夜夜暗盼望！

我剛剛無意中發現一件大事，急不及待通知大家！

一擲千金特別版本
2007年10月28日起，《一擲千金》（張堅庭系列）將推出5集「一擲千金（金裝台慶版）」，請來前任主持許冠文、陳玉蓮、李司棋、鄧健泓、鄭少秋參加。

各位股民，假如有睇開一擲千金，應該知道下星期剩返邊個會出場，假如你相信丁蟹效應，就自己小心啦！

重回戰場

昨晚美股回穩，短期應該再無大跌危險，今天早上將認沽輪賣出，仍有小利。

另外將第一注資金重投市場。數字人生又再開始！

*以上純粹個人亂吹分析，你信我就係你自己問題！

丁蟹再現

九流讀者指引：以下內容可能令讀者不安，敬請留意！

散戶最驚係咩？梗係秋官既丁蟹效應！明晚播出既歡樂今宵團圓夜 ，鄭少秋同鄭欣宜將會參與演出！



有秋官都唔夠，仲要加個欣宜。各位股民自求多福啦！

清倉…

唔經唔覺離開左無網路八個月，期間經歷可以用"數字人生"形容，中間學到唔少野，近期股市波動，所持股票亦從高位大幅回落，前排已開始減持，昨天早上見到大市成交完全唔對路，同過往一個月pattern完全唔同，我估場內似乎暫時已經無實力人士短炒！

於是昨日終於將剩餘股票全部沽清，其實我都唔知自己有無估錯，埋單計數仍有小利足夠暫時開飯之用！

在此要多謝幾個人(唔方便講名)，無佢地之前提醒，我亦未必會留意咁多野！呢個世界真係好多超級高手，我想一世都學唔到佢地十分一！

今日起，我終於真真正正變成一個零收入人士！

*以上純粹個人亂吹分析，你信我就係你自己問題！

傳說中的一疊匯豐股票

今日陪人去搞股票轉名，終於有機會見到傳說中的一疊匯豐股票！

事緣友人正在排隊搞轉名，突然大家視線同時射向同一個櫃台，只見該櫃台的職員正為一對老夫婦處理一大疊已經有點發黃的舊股票，我地好清楚見到個疊股票全部係匯豐銀行股票，後來友人到同一個櫃台處理股票轉名，剛才已處理個疊匯豐股票仍在櫃台上，我地出於好奇探頭一望，有一張處理報告放係個疊匯豐股票上，清楚寫上：八萬一千零八股，可能大家唔知匯豐幾錢，現價一股大約HK$145-150，即係個疊野價值過千萬！

我地一向都有聽過有人長期儲蓄匯豐股票致富的故事！不過親眼見就真係第一次！

常勝與不敗

今日同朋友討論畢菲特沽中石油，中石油反而不停升，股神有無做錯！

我指出股神同我地唔同，佢追求不敗，我地凡人一般追求常勝！可惜我仍屬搏殺中既窮人，只可以係兩者之間追求平衡！

"常勝與不敗"係小說"銀河英雄傳說"中既名言，常勝同不敗有咩分別？假如你唔知道，應該好好思考下！有機會將來就呢個話題再討論！

大時代

今日股市直迫三萬，可惜高位回落。如果唔係，可以去中環個恆指電子板影相，記念一下呢個大時代！

有人問過我點解個BLOG變到咁黑，其實大時代係一套悲劇，就算方展博最後贏左，佢都損失左好多補救唔到既野！

係現實中既大時代，可以制造好多英雄或者富豪，不過股票呢個地方，永遠都係贏家少、輸家多(就算你唔買股票，都已經被大時代波及)。我地呢種凡人，無力改變定律，只有想辦法令自己盡量靠近少人d個邊！

今日加左個youtube...係名曲—放得太遲…畫面配合歌詞造得好好！

你今日摸左頂未？

近日發現街頭巷尾都講股票，好彩我人緣差、眼光差、運氣差，所以無人會問我投資意見！街邊成日聽到人講number(希望唔係我思覺失調)，有人講過連街市買菜都講股票，就係股災之時！

我唔知幾時會股災(知就…)，大家依家都估緊幾時係頂，好多人害怕股災亦摸頂(佢當時認為係頂)出貨，其實係呢種大時代，泡沫並唔可怕，最可怕係你望住泡沫而得個睇字！泡沫帶來財富增值(可以睇作假像)，必然會引起通漲，而且今次通漲受美元加人民幣(再加內地通漲)夾攻，應該不能忽視，假如你手持現金遠離呢個食人遊戲，可能你就係第一個被食！

當然無話買左股票置身泡沫就最安全，呢兩年都唔少人買輪買細價股輸大錢！呢個已經唔係入唔入場問題，而係入場後點做既問題！呢個問題可能花一生精力都揾唔到最好答案！

現在市場已經深受北水影響，泡沫亦開始向北發展，研究呢次泡沫會唔會要大陸買菜個個都講H股先爆破，大家都唔知道！

今時今日撥人上街係唔得架啦!!

陳太繼忽然民主後，今日係遊行爭取普選其間又玩忽然離隊！
有人於網上提供此片段，非常搞笑，特此與大家分享！

http://www.youtube.com/watch?v=jv3RIiw8RDA

神奇班主任(下)

上次提到我個班主任癲佬H身世，完來佢自細已經同普通人唔同，難怪佢平時…

有一次癲佬H於課堂上提起畢業，佢提醒大家千萬別以為坐到夠鐘就可以畢業，除卻畢業，學校可以只令你修業而不能畢業，跟住佢就開始講故…

原來佢以前讀間中學，中四中五會因為會考而分文科班和理科班，佢一生最愛數學，當然讀理科班，不過佢對歷史同文學都深感興趣，認為無理由因為理科班就唔可以讀文科課堂(依家睇返，其實佢係啱而且好有遠見，可惜佢早出世四十年)，於是佢就此向校長反映！大家都估到結果：校長當然唔會理佢，於是佢就玩公民抗命，每逢中國文學同歷史堂，佢自己攞張椅走去人地班房上堂，校長同老師都無佢辦法，但校長當然唔會輕易罷休，於是佢係癲佬H張成績表寫明"此學生未依學校要求修讀課程，故不批准畢業，現授予其修業！"，就係咁，癲佬H中學就畢唔到業！

此事絕無虛構，因為佢俾過張成績表我地睇！

以癲佬H資質，無驚無險就入左中大讀數學，呢個亦係佢人生高峰(最少我覺得係)，佢以一級榮譽畢業(終於畢到業)，以當時大學水平，已經絕對唔容易，最驚人係佢畢業成績係滿分(即係全部科攞A)，佢都好自豪話無人可以破佢紀錄…最多係平紀錄！

當然，我地都見過張成績單係堅！ 其實佢係好鐘意我地呢班(原因不明)，先會講同俾d私人野我地睇，曾經有其他班聞風問佢有關事情，佢一口就話：呢d唔關你地事！

事實上佢絕唔係浪得虛名，我地用個本數學會考教科書就係佢同人一齊著寫(全校只有兩個人有呢個功力，另一個後來成為另一間學校校長)！另外，佢亦有份每年為考試局出會考題目(點解我地知？當然唔講得！)，可見其江湖地位！

於是某問題就係我腦中出現，以佢呢種人，點會走來band 5中學教書！過左好耐好耐，我終於想通左……我對人生睇法亦由此改變左！

有人講過一生能遇一良師，係一種褔氣。到今時今日，佢都係我最尊敬一位良師(雖然我叫佢癲佬H)！

我今日見到偶像……派…

今晚約左三五知己出街食飯，身為一班潮佬坐埋一齊，當然要講時下最熱門，市面上又最多專家個話題——股票！

席間某君提到錯過高位出貨，賺少左，似乎有所感觸！

身為業餘九流資本家，當然出言開解，於是我大大聲講："你估我地係神六，佢個倉期期全日最低位入，全日最高位出，間中假期都做到場外交易！"

大家聽後開懷大笑，似乎大家都明白我所指何事！

由於吹水過度，本人中途離席放水，赫然發現股壇偶像派大師——神六正與數人坐於另一張枱食飯！唔知佢聽唔聽到我剛才講咩野！

中秋節快樂

大家食多個月餅！

神奇班主任(上)

我以前提過我中學班主任對我影響好深，佢亦可以算係平凡人中一個奇人！由於篇幅太長，而上下集方式刊登！

話說我地一班人經歷最後一次中三淘汰試，有幸升到原校中四，但開課首日有一個肥佬走入班房做班主任，此人教學水平之低，若然由此人教足兩年，大家會考一定"肥佬"！好彩佢只係代課，正式班主任由於踢波整跛左隻腳，入廠休息請假一個月！正當大家對肥佬教學非常失望，上左一個月數學堂完全無人知佢講咩，幾乎要揭竿起義！正式班主任終於返工啦！

我習慣叫班主任做癲佬H，以下簡稱佢為H。

H君年約四十，戴一副大四方框眼鏡，由於思考太多數學難題，髮線嚴重後移，假如佢著件背心拿把菜刀，大叫有殺無賠，保證神似過癲佬正傳個秦沛！我最初真係有懷疑佢係癲佬，因為佢同我十幾年來所遇老師完全唔同！當然佢教得好(以肥佬作比較)，不過佢往往有神來之筆，令全班人捧腹大笑！

佢習慣話大家做錯呢題就會得零蛋分，我到今時今日都叫0分做零蛋分，就係習染佢說話習慣！

中華英雄有個華英雄劍掌雙絕，我地班主任就係詩數雙絕，佢係教數學途中，能隨意背出一首詩，而詩意絕對言之有物，首詩當然亦唔係街邊行貨個種！(最少我未聽過)

佢對中西歷史之認識，亦唔似一個數學佬應有，佢可以講講下微積分，同你講下人生高低同唐朝安史之亂！至於數學史，佢經常興奮過度講解世界最有名個幾條數學難題，我地當然唔知佢講咩，淨係知破到一題獎金都夠退休！

成日上堂講第二樣野:

例如佢入廠期間隔離床個人醫左四十幾萬找數，叫大家儲錢以放萬一！

我記得有次佢講起講會考監堂，有某七彩頭少女到場後一直睡覺，夠鐘就交白卷，當大家正在大笑，佢突然間好認真咁講：唔好笑佢，佢隨時賺得多過我！

當用撲克講解機會率，唔知邊個儍學生真係帶副撲克返學校俾人捉到，搞到佢俾人煩(通常煩唔到佢又唔係殺人放火，佢都係閒事莫管)，結果佢好認真咁同全班講:"係我手係教具，係你手就係賭具！"(有一次假期，我見佢約左三個老師拿住某種"教具"急忙離開學校開"教局")

有一次某學生將帛金回禮信封放係老師桌面，當佢上堂行入來，一見信封，即刻不加思考將佢交俾最近個女學生，然後同佢講：你漏左野！

試問有邊個老師會將咁重要又殘酷既真理話俾一班天真無邪既學生知道，令我地唔駛再花時間自己去領悟，與君一席話，勝領幾次野(鑊)！

總之上佢堂係一種娛樂，亦係一種期待，你永遠估唔到佢突然間會做咩，就好似你買飛睇周星馳電影，你唔會估到係咩，但包你拍掌叫好！

由於佢上堂舉止與別不同，我成日覺得佢癲癲地，不過林子祥首真的漢子都有唱："豪傑也許本瘋子！"

當我地同班主任熟稔，開始搏得佢歡心，佢難得到將佢過去講俾我地聽………

我終於係網絡界簿有名氣

經過半年廢吹，本網誌終於可以係Google上尋找到！

我以前用網名係discuss.com發表意見，亦曾數次被蘋果報某專抄網上文章專欄登出，不過由於網名保密，一直無同人講，蘋果報亦無俾任何稿費！

今次終於可以向大家宣布我係網絡界簿有名氣！離網上股棍又近一步！

馬會信徒

前兩日同屋企人去美心食早餐，當時大排長龍，我前邊有個中年男士！

買飛職員：先生，加唔加通粉？
男：仲加！條隊咁長有排等！(條龍長關個買飛咩事，攞人出氣！)

排隊攞食物中…

男：xx啊！琴晚場波無買雲達不來梅！
…
男：我琴晚場波無做功課，買漏凱沙羅頓！我屋企儲左幾年報紙，查返戰績就買得中！
…(幾年！踢個班人都唔同啦！)
男：我琴日無用條主客和公式，輸左四百！
…(有公式，馬會仲駛開！)

佢全場語氣都係相當唔抵個種，好似d錢原本係佢，只不過因為xyz，所以無左！最攞命佢係傾賭波必勝法途中，無所事事把玩餐具，但個套餐具係我個盤！最後我忍唔住同佢講，呢個盤唔係佢，唔該唔好摸d餐具(佢隻手隨時掂完馬經)！

賭波細細地就無所謂，可以增加睇波氣氛，大不了當買六合彩！不過呢位波神好似已經超出呢個境界！其實我以前好多band 5同學都係賭徒！個d理論仲勁過呢位波神好多！最後我無聽過有一個真係埋數贏到錢！

不過佢地年紀大左，好多都覺悟無進一步沉迷！至於呢位波神，可能要繼續做信徒進貢！

中學的第一天

基於某讀者投訴筆者太懶，為免流失最後一位支持者！決定寫一篇作品！由於最近"生活淡淡似是湖水"，亦無興趣寫有關股票之事，所以繼續講下歷史！

各中小學已開學一個星期，就講下我中學的第一天！

第一日返學，由母親大人護送，可能旺角真係太遠，佢都唔係太識路，結果坐左一架"觀光型"巴士，遊遍大半個東九龍先駛出旺角，由於早左成個鐘出門，幸好未有遲到！初到貴境，先來一個鐘晨早週會，當年係無人講人道和平等，二千個學生係烈日當空下企足一個鐘，全體老師即安坐涼亭樹底下！有一次某老師講左一句："今日都唔係太熱！"，幾乎引起史上第一次學生暴動！後來由於有大量學生試圖以遲到逃避週會，週會由最初每星期定時舉行，變成一週內不定時突擊舉行！

早會開始時，全體會被迫大合唱校歌，不過由一班睡眼惺忪又企到腳軟的同學唱出，簡直係一首喃嘸哀歌，當時校舍隣近火車站天橋，每次都有不少上班人士目睹慘況！本校校歌乃全國語版(最奇係某不懂國語之音樂教師能指出有人發音不正)，本人乃新派國語奇才，到今時今日都唔知首校歌講咩，只知道每次唱學生自創廣東話版(同音)，有機會揾俾大家分享！

第一次週會內容係有關會考合格率及壞份子，係中學派位篇已提及，不作重覆！

週會後終於可以返課室，當時本校中一至中三各設十班(係今日一片殺校潮中，當時盛況真係有點不可思議)，以A至J命名！本人被派班別為H！由於人生路不熟，即時揾個有利位置，再同附近其他人吹下水！當老師入到課室講完廢話(自我介紹，叫你聽日記得帶咩，最緊要係錢)，開始點名，怪事就發生啦！

班主任：仲有邊位未點名？
迷惑的我：我啊！
班主任：你出來，睇下係唔係寫錯名！(因為學校質數，有部份人會另外揾學校而唔報到)
疑惑的我：我叫XXX，有無啊？
班主任：奇怪！無你個名，有幾個似，不過都已過報到左，唔會係你！

唔通教育史上奇蹟出現，教育處係中學派位搞錯左，我可以離開呢間band 5中學！事件就咁擾攘左好耐，最後班主任可能開始懷疑係我問題！

班主任：呢位同學，請攞出你張編班通知書！

為表清白，我攞出左張編班通知書俾佢睇！張編班通知書確係H,大家都唔明點解無我名！奇蹟離我越來越近！再過左一陣，班主任終於唸出呢個答案！

班主任：呢位同學，可能張紙寫你係編去A班！
憤怒的我：我讀得書少，你唔好呃我，A字係連口，呢個字係開口，雖然有點向內，點會唔係H！(希望大家明我講咩)

班主任已經唸唔到其他可能，為求放學，無可奈何對我下逐客令！到左A班，大家已經準備放學！我終於見到自己個名，見微知著，大家從一張紙就可以睇出呢間接係咩野學校！由於全班滿座，我只可以坐係班房最後個角落！對於有近視的我，基本上睇唔到黑板寫咩！由於呢個原因，我母親終於肯帶我去配眼鏡！(佢一向認為此非近視，乃睡眠不足引致之濕熱的眼膠所致)

庄家與散戶之對話

庄家：我等了這麼久，終於把你盼來了，你就安心坐在這船吧，不用想別的！　　
散戶：我可以 離開嗎？　　
庄家：不，你甚至想都别想！　　
散戶：你能讓我賺錢嗎？　　
庄家：當然！　　
散戶：你會賺我的錢嗎？　　
庄家：不會，你怎麼會有這樣的想法？　　
散戶：出貨前你會通知我嗎？　　
庄家：會的　　
散戶：你會套牢我嗎？　　
庄家：無論如何都不！　　
散戶：我能相信你嗎？　　
庄家：哎呀！你在想什麼呀！？

買了之後他會告訴你：你應該倒過來從下往上讀，這才是實話！

(轉載自香港討論區)

放榜奇遇重讀記

明天又係會考放榜，祝各考生考得理想成續！

上回講到我被派去一間band 5學校，無心向學左五年，終於到左考會考！話說我所讀班別乃全校精英，不過好似到左二月好多人都未知咩野係模擬試卷，實力可想而知！

依家睇電視，好多家長都陪子女等放榜(不過我認為某電視台放榜前一晚搞晚會簡直係害人不淺)，甚至緊張過考生，我當年就無咁幸褔，無家人理，一早就同班朋去學校對面打桌球，點知學校提早放榜，當我地依時返學校已經人去樓空，班主任(係一個對我影響好深的人，有機會再講)坐係班房到等我，張成續單叫做全科合格，八料十九分(當年唔算好)，不過英文得E，所以升唔到中六，其實連我呢個唔讀書都有十幾分，我真係想像唔到點解現在有d學生話自己"盡哂力好努力讀書"，然後得幾分！

當我接到張成續單，我班朋同我成績唔同，根本上重讀都只可以搵私校，我屋企當然唔會俾錢我讀私校，所以只有搵津校重讀，原校重讀係好黑暗，學校只會留學位俾可以出去獎的學生，當然無我份！當時突然醒起一個問題：中六我就唸過下，不過我好似無唸過去邊到報重讀啊？

當我正在思考呢個咁重要又關乎我一生的問題，我不知不覺行到去的士站，見到一個平時淨係吹得幾句的同學黃某，以下係我地的對話：
黃:九流，你去邊？
九:無啊，搵學校報重讀。你點啊？
黃:我搭的士去搵學校，唸住係屋企附近重讀—(當年全班得四個人升到中六，已經係歷界最強)
九:的士？(外邊好熱下)，不如我同你一齊去(坐多個人都係咁多錢，不過最好你俾)！
黃:無所謂，上車啦！
九:好啊！(點計你搵個間都唔會差得過我地原校！)

其實直至上車個刻，我係唔知黃某住係邊，好彩佢住係樂富而唔係沙頭角！就係咁，我就跟人去左一間連校名都未聽過的band2/3學校重讀。

新的學校，有新的開始。我驚人地發現原來正常學生係生活係另一個世界，有一次我問一個同學放學去邊，佢話要去圖書館溫書，個刻對我真係好震驚，我以人格擔保，我係生平第一次聽到有人話空堂同放學會去圖書館溫書！我一向淨係知放學唔係打機就係踢波！經過一年"正常"生活，我會考終於有三十分，不過我好有自知之明，深知A-Level英文一定過唔到，所以做左幾日中六生就去左城市理工！

講起有d奇怪，我一家有三個大學生，但就無人考過A-Level，連中七都無人讀過！

我賺左一百蚊！

特別無聊報告：

我今日同老婆睇一擲千金，我打賭參賽者個箱係三百萬，結果贏左我老婆一百蚊！

報告完畢！

摸頂王再起風雲

今日同二流程式員閒聊，提起摸頂王！摸頂王係我前任上司，此名由來源於此君經常摸頂，九七買樓、二千買科技股，近日有聞此人再度進入股市，心中已感不安！今日更聽聞佢入市與本人有關，更感驚呀。

據聞唔知那裡來的消息，將本人形容到股神再現，攞住退休金係市場翻完又翻，唔駛幾個月已經發左達！摸君聽完此消息後若有所悟，跟住就再進入呢個佢話過唔會再入既戰場！雖然我當年對摸君管理模式頗有怨言，不過佢始終唔算大奸大惡，比無網絡某些生物已經好很多！其實我頗擔心佢情況。

其實我由始至終好少提及自己投資，因為我覺得呢d係個人既事，我個套未必適合其他人，而且係好多方面，我都仍然係摸索緊，邊有資格扮專家講道理！不過我可以講我唔係隨便會做買賣！每一次我都會唸得好清楚，假如有人唸住我係日炒夜炒賺大錢，恕我無法滿足佢地心中幻想，我鐘意睇大時代，不過假如好似佢地咁買股票，真係多多都唔夠輸！而且我亦唔係為左攞份退休金炒股而辭職，真正原因我已經講過，唔再重覆！我身家亦唔多，離上岸嘆世界仲差十萬八千里！

其實我講咁多，係希望大家唔好再憑空想像亂講，真正明白我思想同做事既人其實唔多，我明白有時大家吹水吹大少少娛樂下，不過唔好吹到令人信以為真，你不殺伯仁，伯仁卻因你而死！

另外假如有人認為我能賺，佢無理由賺唔到，呢個係佢思想自由，不過請唔好拖我落水。其實我一直好想同某些人講：可能係好多人眼中，我一直係一個唔起眼既人，不過假如有人認為一個一無是處既人可以由一個band 5仔變成大學一級榮譽畢業，好明顯能力不足個個唔係我！

九流資本家

上兩個星期，有幸能一睹林森池先生最新大作，雖然其中好多分析技術對於初哥既我，未能太充分掌握，不過佢其中好多思想都令人留有好大思考空間。香港其實好難得有呢種高人肯無私分享自己經驗俾我地呢d股壇初哥！

睇完本書，我先知我唔單止係量地官，仲有個好高級既名叫資本家！以後填表係職業個欄，可以填 "九流資本家"！

消失的小學…

我星期日睇報紙，我以前間小學因為收生不足，宣佈停辦！又可以講下歷史！

本人當年小二由木屋仔成功上樓變成屋邨仔，所以需要轉校。當時我母親帶住我同哥哥到處搵學校，據聞曾經有一間名校收我個天才兒童既阿哥，不過就唔收我，結果我阿媽迫住要我阿哥陪我讀呢間平民小學(好彩佢最後做到band 1仔，唔係肯定怨我一世)。

其實當年仲細，所以無咩特別記憶，我小學時比較孤僻，亦無咩朋友。我阿哥就全級考第三，係典型模範學生，我就全級考百三，係典型無前途學生，記得我經常會唔交功課，代價就係要係禮堂留堂做完先走得，所以坐得係個度，都唔好得去邊。由於我阿哥每日要等我放學一齊返屋企，所以佢一定要坐係禮堂等我做完功課先可以一齊走！每次有老師經過見到我阿哥係到，都會以不可能既表情問呢位品學兼優模範生點解會留堂，答案當然係佢個累家坊細佬！

其實小學生活都幾平淡，除左每日無心向學上堂瞓下覺，正所謂文又唔得，武又唔得，好學生又做唔到，壞學生又唔敢做，始終唔及中學生活多姿多彩，話哂我中學都做過全班第三，又代表過班足球隊(做龍門)，算係威過下！

中一派位—第六志願？

今朝睇新聞，原來又到左中一派位，聽聞好多學生都能進入第一志願，希望佢地中學生活愉快！我當年就無咁好彩，基本上區內只有兩間好學校，所以每個人都會選，我成績係好一般個種，所以希望甚少！當年結果係張貼於壁報版，我排除萬難，一路爭先，終於擠到壁報版前，結果…

?？呢間係咩野學校？我有報過？

原來係第六志願，我阿媽當時話樓上阿邊個讀緊，認得個學校名，隨便填上去(根本上一般人都只係關心頭三個志願)，就因為咁隨便，我人生就開始轉變！

我家係彩虹附近，我就讀間中學係旺角！旺角？我平時最遠都係去過黃大仙！跟住我每日就要迫巴士，當我讀中一時，巴士站係無人排隊，隊無前後，達者為先！

第一日返學，先來個早會，千幾人企係操場曝曬一個鐘，所有校長主任就坐係涼亭，同你講今日唔算特熱。(後來發現，企到咁上下可以扮死，有人會送你去冷氣房！) 不過第一日早會令我最奇怪係校長講話，佢好自豪話今年會考合格率又升左，有六十幾巴先！等等先，我見報紙講親都係會考幾優幾良比率，點解佢講合格率？(我後來知點解啦！) 而且校長不停講學校有人結交壞份子，所以放學時門口有壞份子，已經叫警方加緊巡邏！嘩！呢間係咩野學校！

其實我好坦白，我係個五年內基本上係無認真讀過書！我頭一次期考考到全班第三！呢個係一個紀錄，不過原因唔係我聰明左！就係我成為全班第三不久，我遇到一個以前讀書叻我好多既小學同學，佢考入左我所提及個兩間學校其中一間。當大家講下近況，佢唔係太開心咁講佢考全班第二，不過係倒數！假如我當年"好運"入到個兩間名校，我相信我會年年包尾，中三俾人踢走，絕唔會有今日既我！

係中學五年中，因為大家都無心向學，所以反而會專注係其他野身上，學到好多其他band 1仔唔會學到既野！所以回望返過去，去到呢間中學，其實可能係對我最好安排，我係個五年亦過得好開心，從來無後悔過！我偶爾同中學同學講返中學時樂事，大家都樂此不疲，有機會再講多d！

所以人生唔需要事事求最好最完美，只要適合自己就可以，一切抱住平常心隨遇而安即可！

孤獨的量地官

今天，又再有兩個同事離開無網絡。現在留在無網絡的舊同事，已經所餘無幾。
前兩天我應約跟其中一位快將離去同事返回公司共進午飯。當我站於公司門外，看到內裡空空如也，不知不覺已經離開了無網絡四個月。想起以往在無網絡所發生的事，好生感概！回想這四個月，生活還未完全適應，錢是賺多了，不過有時候會感到孤單，畢竟以往在辦公室有一羣人作伴，工作雖然無聊，不過最少有事可做。很多人以為我會很忙地每天在家中操盤，不過真相係我經常無所事事在家，大部份時間都係非常悶，近日亦有小注投機解悶，幸好身邊還有老婆和孩子，不然孤獨的日子會很難過。

今天我又與我太太到酒樓用膳，雖然已是下午茶大特價時間，隔鄰坐了一個頗老的老人家，他一個人獨自點了一條蒸魚(石班類)加白飯，看來應該唔會太窮(當時全酒樓的窮人都在吃特價點心) ，不過就顯得好孤獨。我在想，假如我有機會有老的一天，不知道又會是何光景！

點解不升 - 股海風暴主題曲

(轉自互聯網討論區)
誰人無低吸高放的渴求
誰人無高追拋貨的理由
平凡人生 股災過後 要怎麼走

如何能得到資訊先過人
誰無狂想 不可告人難忘曾經
風光過後 留下我

插落時跌下時那時想沽不易 朋友
爆鑊時你以為再等一會還有時侯
即使升幾多都要清醒
有幾多消息也未必升你
彷彿看到我逐隻升
輸了 無話你聽

點解不升 點解不升
為何獨她一隻不升
我真的滿意佢份業績不過 仍然難解釋

誰人能炒股一世不理人
如何才得資格可變神
完全無他 只得我是 明白我

我的青春啊……

今日去接仔仔放學，我太太話仔仔每次放學都會去隔離個籃球賽搶哥哥個籃球玩，所以今日我地帶個籃球去接佢放學。由於時間未到，我就去籃球賽射鎖匙圈減下肥，後來又同仔仔玩左一陣，點知對面籃有幾個學生叫鬥波，本來我都話唔打，不過佢地唔夠人，唸住玩一陣。

其實班人都普通，梗係唔及無網絡d同事勁，結果頭十五分鐘梗係掂哂，連其中一個又肥又高過我既，都俾我食哂位搶哂…
不過十五分鐘後就大鑊啦，我由籃板王變成佈景王，因為已經無氣走唔到，雖然身型都打得下，不過威脅就越來越少，打完返屋企好仲似俾人拆骨唔。

眼見班中學生都唔識倦，感覺年青真係好，我以前係佢地個年紀，中午十二點踢幾個鐘頭波都無事，琴日我係街行一陣已經頂唔順去七仔搵野飲。

我的青春啊……

殺人放火金腰帶，收橋築路無屍骸

呢兩日發生左d不幸既事，一位護士因為善終送暖服務，係路上遇到交通意外身亡。另外一位消放員亦係火警中喪生。

其實呢個世界好無奈，殺人放火金腰帶，收橋築路無屍骸… 前幾日係電視見到某老千商人捐左三百幾萬俾某善善機構，上台做哂宣傳，跟住仲做左唔知乜野永遠名譽主席，三百幾萬？全世界都知佢任何一單陰質衰野都唔止呢個價。傷天害理喪盡天良巧取豪奪，然後用九牛一毛扮慈善家，簡直連無恥都無法完全形容呢種人。偏偏呢種人就每日大魚大肉，反而好人就…

其實有時我都會唸下點解....

無聊事一則…

好耐無寫BLOG，今日寫d無聊野打頂住，當吹下水。

今日同老婆趁仔仔返學，去左坑口吉之島睇野，跟住去左隔離間酒樓，見差唔多兩點，門口有一班女仔企係到，唸住唔通有下午茶大特價，於是我地又等(人窮志短)，不過等等下梁師奶投訴太肚餓，結果唔理咁多入左去，個企堂話已經係下午茶時間，不過我見班女仔仲係企係到，點解？

當某兩人太肚餓狼吞虎嚥，突然梁師奶大叫"明星啊"，我睇睇原來係企堂帶林峯入來搵人，跟住我阻止梁師奶繼續大叫，事緣梁師奶年紀都唔細，而且在場其他人無乜反應，唔好失禮人。當兩人繼續狼吞虎嚥，突然見到有個美女經過，仲好鬼高個種，睇清楚原來係鍾嘉欣，呢次反應唔同啦，佢經過之處群眾一直起哄。今日乜日誌？咁多明星？

一問之下完來溏心風暴係商場到做宣傳，然後係到食飯。咁即係…仲有法拉啊！！！

後來其他人都離開，不過唔見法拉啊！！！得林峯、司棋姐同夏雨(剛才鍾嘉欣已經走左)，當佢地經過我地張枱個時，剛才企係門口班女仔突然出現，捉住林峯要影相，有師奶見機不可失，亦捉住司棋姐合照(不過無乜人理夏雨，佢自己同食客吹水)…林峯同人企係梁師奶隔離影相，梁師奶仲唔識郁，阻住左人。(梁師奶年紀都唔細，見到靚仔都仲…)

唸唸下好彩無同班追星族一直企係門口等，唔係餓死都有機。

電話費一萬蚊的無知少女電台訪問

五一個日同二流程式員去左食飯，同佢提起有個中學生要交一萬蚊電話費，有興趣可以聽下：

http://video.renren76.com/view_video.php?viewkey=f4c8043749885523d6a2

越聽真係越驚…我讀中學個陣，一萬已經係天文數字，買件四十蚊波衫組隊踢波都要唸計籌錢。

假如我個仔叫我買GUCCI俾佢……我一定絕對打鑊佢！！！！！

祝仔仔學業進步…

仔仔今日正式穿校服返學，希望佢聽話，學業進步。

仔仔兩歲啦！

希望仔仔快高長大，身體健康，學業進步。

誰明股仔心

誰明股仔心 ?(爆笑中) — 轉載自 www.discuss.com.hk

原曲：誰明浪子心- 王傑
曲︰王傑
詞: tropicalfish (對短炒損手的散戶真係感同身受! )

可以笑的話 不會哭
可找到低位 那會屈服
偏偏我永沒有遇上

令我高追一剎那高峰 損手結束

可以博的話 不退縮
可炒起的股 那怕追逐
可惜每次坐艇做蟹絕對使我感覺我始終 做緊阿福

*聽說要去博殺對沖要做足
實在冇錢擔起這種揮霍
現在這日我又再度想博
壯志激昂 依舊繼續
不想收起一切 不信今天是結局

@聽說太理想的股價 總不可接觸
我卻那管煲足一世 亦要設法去捕捉
聽說太理想的股票 都不可接觸
我再訓身股海怒濤 莫怕晚晚要食粥 (食粥......)

升爆市的夢 不結束
偏偏過山車 次次開動
必需要確實領略到
就算擺足一世也甘心 心卻未足

我對社會有無貢獻？

前兩日，同一個一同離職既同事上網吹水，佢覺得無左份工又未搵到工，坐係屋企好似對社會無乜貢獻。

其實我係無網絡七年，你問我對社會有乜貢獻？呢個問題，我係無網絡個時，已經唸左好耐。除左交少少稅，好似無其他。假如你話我維護緊中國數以十個網路穩定，我可以肯定，佢地唔用無網絡既產品，網絡會更加穩定。

傳統思想係讀書畢業，然後搵份工甚至做下生意，再成為社會一件零件，再推動社會發展，咁就叫貢獻。不過社會變得好快，其實係唔係有份工，先可以貢獻社會？我覺得好似貢獻俾你上司同老板多d。畢菲特從來無大規模經營任何企業(除左巴郡)，不過佢對社會貢獻比好多人都大。當然，我唔係鼓勵有工唔返，走去坐係銀行炒股票(呢兩日都去過銀行刺探散戶軍情)，其實貢獻係好抽像既野，只要你有心，任何時候地方同方式都可以貢獻社會，相反好多人為左自己利益，做好多傷害其他人既事，就算佢地捐幾多錢，我都唔覺得佢地對社會有貢獻。

不過我同意一個道理：先搵多d錢，有錢可以更容易對社會作出貢獻。

阿仔，你叫乜名？

今日收到幼稚園入學通知書，要求明天提供仔仔英文名。
本來唸住等佢大左自己決定，現在已經無辦法，唯有攞本字典睇下搵個名頂檔…

本來想叫佢做Howard，因為同中文名有同音，不過個名好老，佢兩歲都唔夠。

唸住叫Benjamin，同畢菲特師父同名，都唔錯，不過記得二流程式員講過，個中文釋音好不文。

不如叫David，同碧咸同名，我以前有個靚仔同學都係叫David，守龍門仲刀槍不入。

正在唔知點算，突然見到tony本富足一生，不如就叫Tony，得閒圖下利都唔錯。

有無人有其他好提議？可以按comments/意見提供下。

贏家/輸家的特徵

今日上網見到一篇野關於股票贏家和輸家的特徵，幾有意思:

贏家的特徵︰
1.市場贏家擁有高超的忍耐力，等待低風險高回報投資機會出現才會入市。
2.市場贏家對一些不可避免的小虧損不會介懷。
3.市場贏家習慣信賴自己的判斷，他們的信念不會輕易受人動搖。
4.市場贏家是會採取周密的資金管理技巧，入市前先作好完善部署，並作出兩手準備，一旦市況發展未如預期，已有應變措施，而不是抱著見一步走一步的被動心態。
5.市場贏家是不會到處宣揚他們的買賣活動的。

輸家的特徵︰
1.市場輸家是時常懷疑自己和自己的買賣方法。
2.市場輸家的買賣是為了追求刺激，將買賣視為一種合法賭博。
3.市場輸家是時常"逾度買賣"，缺乏投資紀律。
4.市場輸家是沒有妥善的資金管理技巧，或甚至完全沒有資金管理技巧。

(轉自香港討論區)

睇返自己，贏家同輸家特徵都有，現在正嘗試進步中。
假如大家有興趣可以留言，得我一個人自說自話覺得好悶。

煤礦與金礦

今日見到超世界間科技公司話轉型做煤礦，股價翻左幾翻，有d野大家可以反思下，我真係唸唔到中國邊度有咁大既煤礦，可以即時令股價升十幾倍，資源業唔係容易既行業，採礦加工同運輸都要好大成本，而且資源價格有週期，絕唔係起支旗就有錢湧入呢。睇到呢段新聞，只係覺得香港可能風光不再，好多有錢人都開始不顧名聲，公然用下三流手段搶小市民錢。順帶一提，令一隻"巨樓"系老千股亦有所動作，已經放風聲要轉型做中國資源。

今日有隻澳門金礦股新上市，跌破招股價收市。呢隻股超額得5倍，有人用孖展抽IPO，結果由於分配過多，被證券行迫令於開市前補倉，結果當然…
其實呢隻股係澳洲上市3年都無賺過錢，對於正值黃金大牛市既前幾年，真係幾不可思議。仲記得舊年新股狂熱，好多人連公司做乜都唔知就走去抽，甚至有人妄言全識IPO代替返工，不過股票市場係無一條必勝方程式(除左及早離去) ，係做任何買賣之前都應該三思。

超世界

今日聽到超世界要分拆大陸百貨，第一個反應係:又cap水。

本人曾經係中國好多地方出差，其中一d大城市有超世界既百貨公司，真係好難理解點解人地隔離d商場人頭擁擁，佢d場可以水靜河飛。呢樣野真係要好高管理技巧先做到。超世界老板個仔醒過董伯，相信好多人都知，老板年事已高，加上要玩明星仔以平衡當年靠外家既陰影，所以超世界已經由當年四大家族變成現今千王世家。

本人曾經係超世界其中一間分公司工作，入面好多皇親國戚，個個唔係傳係老板就係老板娘d親戚朋友，我亦見過一個不學無術既人，因為同高層打波落club，係公司狐假虎威，最後仲上到去做經理。雖然分公司唔代表全部，但呢個世界有句說話叫"見微知著"。個時我地分公司話哂係高科技，成日有人帶老板d親戚朋友來參觀下高科技，每次參觀都要停工清場，有次仲係班七十幾既公公婆婆，真係唔知佢地想參觀乜。

我曾經同幾個係超世界出來既同事傾過，大家不約而同有一個結論: 咁既公司，唔駛錢都唔會幫趁，到今時今日我都無直接用過超世界d野(超巴例外)。

假如我講左咁多，你仲覺得超世界百貨大有可為，我好佩服你既眼光同膽量。

千王之王

今日係第二日做自由人，上午係屋企執下野，下午繼續瞓覺(猪型人生活)，晚上走去搵二流程式員食飯，當然係有業既佢埋單。我地講開今日係細價股股災，例如 "電車男條女"、"南海油王" (二流程式員仲講左幾隻，不過唔記得) 今日都跌好多，令我唸起謝老四個套經典戲名 - 千王之王。

其實佢地不外乎都係個幾招，當成交小先托上個價，吹d冥王星發展大計，搵人出去吹風，跟住就自動有人上當。當佢地高位散完貨或者達成目的，股價掉頭，跌到咁上下，假如玩得太大，個價太低，可以玩六神合體，改個好聽d既名，過一兩年再來過。

第二隻唔係太清楚，知道"南海油王"係因為公司幾位自稱醒字派經理中左招，所以一路都有留意(最少要知佢有無改名再千過)，佢個d油田發展大計每三個月更新一次，然後股價升一兩倍，跟住就會發生一d財技事件，然後股價就會直插谷底。可能舊年市旺，唔駛改名洗底，三個月後又會有新發展大計。

我認識好多人都好抗拒股票，認為係食人既遊戲，可能係因為太多呢種千王爭覇賭局，抹黑左股票。我明白貪念係人既本性，但假如你明知呢個係千術比賽，唸住同千王做莊去千人，最後先發現自己係閒，其實你只係玩緊一個貪者上釣既街邊估公仔遊戲。

背棄一切旗幟

今日終於係十年來第一次無背負乜乜公司名義，過自己既生活。

第一日…

由於市場波動，暫時無大舉入市意欲，而所持股份屬長線，亦無意賣出。結果今朝同仔仔去完街，成個下午都睡覺。想唔肥都難…

离别是为了相聚

始終係到渡過左七年，發生過好多事，有開心有唔開心，到最後走呢刻，始終有一點唔捨得。係呢七年，我去過好多地方，經歷過好多以前無遇過既事(住過好多五六星酒店)，認識左好多人(主要係美女)，我太太同仔仔都同我份工有莫大關係，最悶反而係最後個兩年留係香港，不過始終有家室，唔適合再到處跑。無論如何，無網絡都係我人生既轉折點同一個難忘既回憶。雖然離開左無網絡，不過我知道新既生活同事物又會係前面等緊我。

离别是为了相聚，只要能相聚，無論多痛苦的离别都可以忍受。 (七武器—離別钩 古龍)

最後一日…

今日終於走完係無網絡最後一程，不過無網絡個人事部真係唔掂，全日無人聯絡我，到我打電話去問，先話過幾日會過戶條尾數俾我，問佢點樣計出個尾數，佢地話唔會話俾我知(咁都得?)，淨係得個大數，真係有無搞錯，最後佢先話叫我發過郵件要求，佢地會搵人做條數覆我，至於d証件仲混亂，一時又話放係某HR prime枱面，佢今日homeoffice(點解HR都可以homeoffice?)，聽日返工會收，好安全無人會攞，d証件包括信用卡同員工証，儍左先會就咁放係到。講講下仲神奇，佢話我係辭職唔係被炒，唔關佢事，叫我自己打人事部hotline(乜你唔係人事部?)，跟住仲要自己周圍去各部門退還証件，最神奇係有d証件A部門話係B部門管,B部門話係A部門管，結果個d証件依家仲係我個袋，乜野exit meeting，影都唔見，我都有d唔放心，都唔知到時有無錢收，面對d咁既公司，真係唔知可以講乜。

辦公室真言十八式

今日係Office執野，見到張野幾有point，在此分享一下:

樹大易招風，胸大多人碰
傳聞辦認通例：兩成當發生，五成當係真
愛上老細，九成乞米
愛上公司，肯定白痴
三五成群，邊有好人
庸脂俗粉，吾慌穩陣
天生一副小人相，額尖面窄嘴舌長
老細敘頭，梗有計謀
老友握手，梗有人走
天生庸材亦有用，捱你唔死一世窮
無風吹大浪，梗有人上當
寧俾人知都莫俾人見，三餐唔掂都咪餓到出面
八得就唔好嘥，是非可以當人情賣
公家不如大家，大家不如私家
大數變小數，小數變無數
一代鐘神，夠鐘走人
一隻鑊兩隻耳，搵人幫手拎一邊
煩事皆因強出頭，閃埋一邊樂悠悠

咩野叫"apartment"

無網絡法國佬話因為部門要留番d錢俾佢同鞋油friend用，所以我地返大陸出差唔可以再住酒店，佢係個重慶大厦feel地方租左幾間爛屋話係”apartment”， 佢地自己返去當然唔住(住返酒店)，但其他人就一定要住”apartment”，我曾經問過佢地咁樣唔經工司程序，出左事邊個負責，呢個問題到今日都無人答到我。所以到今時今日我都拒絕住呢d爛屋，佢地亦無我辦法。

間爛屋半年來劣評如潮，但好多人為左份工敢怒不敢言。

我係上海同廣州出差都住過apartment，係時候俾各兄弟睇睇咩野叫做apartment，唔好俾人攞工廠區木屋當豪宅昆。

回憶之照片

由於二流程式員要求，貼幾張相出來:


火焰山 cross cover 兵馬埇


左:靚仔騎駱駝 右: 呢張相登過上雜誌


左:黃山看山 右: 九寨看水

仲有d靚女相，不過唔post出來…

係無網絡公司的回憶…

首先係度向大家恭喜發財，因為發生各種不可思議事故，到今日先再寫野。

經過多日收拾，終於由百廢待興變成五十廢待興，間屋開始成型，二流程式員琴日來做訪，指出家中有各種風水問題，不過先天所限，亦已無力再大執，遲d住落再算。不過間屋就肯定唔利佢，佢未入門口就中call，借我部腦做野，個顯示器按鈕又接觸過良，條網線又儍下儍下，最妙係佢走左後，所有野回復正常。

今日睇新聞，話去年有三分一新婚係香港男娶內地女子。我老婆都係內地人，有時文化同生活習慣差異真係想像唔到，結左婚四年，大家仲好努力適應緊。

離終結日仲有四日，我就會同無網絡公司講再見，呢幾日收拾物件，見到好多以前物件同照片，鈎起好多回憶…

第一次出差返大陸，一個儍佬係北京，結果識左一班朋友，有d對我影響都幾大，而且到依家都仲有聯絡。
曾經一班同事係天津食火煱，晚晚鬥食辣椒，互對白酒，杯酒當歌。
一堆人係吐露蕃去睇火焰山，再偷雞坐夜班車去騎駱駝行沙漠睇敦煌石窟。
因利成便，係西安做完野兼睇完兵馬埇，再同老婆去九寨溝預渡蜜月。
係上海騙吃騙住(因為個project無野做)，同老婆公費度左三個月蜜月，乘機去左黃山同南京玩。
係北京君悅，有機會坐係梁錦松同伏明霞隔離臺食早餐。
再臨西安遇到班無良友，想屈我地做野自己領功，係全無大佬撐腰下同呢班經理級鬥智，結果依時完工兼玩到班友飛起，佢地最後仲要被迫受命頒返個獎俾我地。

仲有好多回憶，不能盡錄，所以我從來無後悔過入無網絡公司，亦唔會恨佢，相反我好多謝公司俾機會我去充實眼界同荷包。

百廢待興…

琴日終於搬返新屋瞓，面對住一袋袋野，都唔知點放，唯有暫時放係大廳，加上近日舊傷復發，條腰用力時有d痛，所以進度更慢。最慘攞住個羅絲批，笨手笨腳，經常被老父責罵。

哈哈！小弟已經生得頭腦唔醒目啦，再加上四肢又唔發達，真係唔知將來點算。

最後一個月

終於到左最後一個月倒數，下個月就從九流無網絡通訊工程師，變成九流無工作量地官。呢份工係我做得最耐，雖然係技術同管理層面，乜都學唔到。不過就見識到好多野，尤其最初幾年到處跑，更見到好多以前無唸過既野，我太太都係出差時認識。
而且呢份工令我係經濟上獲益良多，所以到今時今刻，我都仍然好多謝公司。我離開只不過係睇唔過眼公司入面一d垃圾既所作所為。
不過工作左十年，都係時候休息下，唸下以後既路，通訊工程絕對唔係一條好既路。

無題…

近日忙於搬屋，無上網更新BLOG。

近日公司其中一個熱門話題係俾人炒左之後做乜，同埋攞番P-fund同遣散費點樣投資保本。因為我地有一半人係一個月後都有呢個問題。

對於俾人炒左之後做乜，我無乜頭緒，休息完睇下到時有乜野好做。至於d錢點投資，有人話買樓收租，有人話買人民幣債券，我係投資白痴，乜都唔識，淨係識買股票。

我一直相信打工唔會發達，賭錢更加唔會(除非你開賭做生意)，只有從商先會有機會發達或者退休，打工只係為生活同儲錢做生意，但呢個世界並唔係每個人都適合做生意，正如我呢舊木頭就絕對唔得。但假如投資股票，就等於將錢放進一間公司，由一班識做生意既人去幫你做生意，當然，你係選行業同公司都要考慮過先。

好多人包括我屋企人都誤解股票係高風險、輸身家既事，其實只要你真正瞭解股票，就唔會有誤解。正如葉天所講，股票係集資做生意，當然有風險，但唔係你放錢入去，就一定無回頭，個種叫合法騙局，但貪者上釣。

只要你懂得避開高風險，選中行業同公司，然後等待收成，係一件絕對愉快既事。股票投資並唔係睇一日兩日既價位去論成敗既事。

阿仔，係時候教你一d做人既道理…

仔仔，
你爸爸好快就會從九流工程師變成九流量地官，以後唔好用咁多尿片啊，慳d用啊！
雖然你爸爸唔係有錢人，不過都唔想為幾斗米趴地。雖然每個人都要食飯，但人生於天地，唔可以無尊嚴而生。你將來長大，就會明白。可能係你長大前，爸爸已經因為無錢開飯而餓死左，所以提前同你講下d做人既道理:

說話自嘲無傷大雅，但有損人格而傷害人既事唔可以做 ——— 量度人格既標準唔係說話，係行為。
說話好聽既人不可信，說話難聽既人可以參考 ——— 因為忠言永遠逆耳。
用眼睛去睇事物，唔好用隻耳去睇事物 ——— 呢個世界懂得巧詞弄飾既人太多，而且好似越來越多，大有劣幣淘汰良幣既趨勢。
平時越係扮硬漢既人越可疑，好可能佢地先係真正既擦鞋仔 ——— 好少男人天生會無端端成日硬，好多都係別有用心去扮。
無故討好你既人係最危險 ——— 除非你好靚仔或者好有錢，否則通常都唔會係好野。
做人平時應該低調d，尤其係敵我未明個陣 ——— 低調可以避過好多麻煩，而且更容易睇到邊個先係朋友，最重要係從低點俾人係背後推落去無咁傷。
對於不喜歡的人，沒有必要去討好他 ——— 靚女除外。
不瞭解我的人，不必非讓他瞭解我不可 ——— 醫生除外。
對於個種踏低別人以顯示自己優秀既人，不妨多加稱讚 ——— 唔好問我點解，我好鐘意見到d自以為是既儍仔從更高處墮下。
越係無料既人，越係時時刻刻搵機會表現自己有幾勁 ——— 希望你唔會膚淺到信佢地老吹，係"此地有銀三百兩"個牌下面，絕對唔會有任何銀兩。
同個人的自由及權利相比既話，公司並不是什麼大不了的事 ——— 除非你係老板，否則返工係做員工唔係做奴隸，做奴隸點止呢個價啊。
道義，只需要同講道義既人講 ——— 你唔係鐘意同隻狗講環保啊嗎？
三人行，必有我師 ——— 搵唔到個正面學咪搵個反面警惕自己，講到咁白唔駛再解釋啦。
任何時候，都要有憐憫既心 ——— 如果唔係真係生舊木頭好過生你。
年紀可以老，心境唔可以，雖然現實係好無奈，不過無童真既人會活得好辛苦 ——— 你見大人開心d，定細路開心d。
生活需要樂觀既態度，只有積極樂觀先可以走出困境 ——— 電視有教啦，希望在明天啊。
世俗禮法可以唔太計較，大節卻不能輕視 ——— 唔好問我點解，黃藥師係射雕英雄傳第34回講。
對事情唔好太執著———幾時都係放低無揸住咁啃力。
得意時，說話做事唔好太盡 ——— 世事無常，天數亦未可全料，凡事不能去得太盡。
失意時，思想情緒唔好太灰 ——— 逆境先係最好既學習環境。
任何野都可以輸，但有三種野唔可以輸：自信、人格同尊嚴 ——— 因為呢三樣野用錢買唔到，但最可悲係有d人會大平賣後兩種。
家庭同健康比世界任何一樣野重要 ——— 唔駛解釋，你做人爸爸就會明。

最後緊係好似爸爸咁，要有做儍瓜既勇氣，安能摧眉折腰事權貴，使我不得開心顏。不過聽講因為平時低調過頭，有d人好似以為辭職個個唔係我。

九流無網絡通訊工程師上

從九流到無業…

哈哈，我今日做左個好大既決定 — 我炒左我大老細!!!!!!!!!!!!!!!!!!!!!!!!!!!!!!!!!!

事緣今日個舊戰友LAST DAY，已經唔開心，點知今朝收到風，淨番個d同事其中一半要北移神州，仲係叫你resign再簽一間國內公司，個待遇除左可恥真係唸唔到其他形容詞。基本上仲衰個做大快活。真係唸唔到一間自稱跨國大公司，會出d咁低莊招數，不如直接炒。

雖然我唔係個名單到，不過剩番d野得兩個人做，我本身都唔係懶，不過真係會死人，一唸到一年有一半時間7x24做emergency support，放工唔去得街，聽到電話響就嚇到成個彈起，有事就成班白痴圍住問你點解，仲要跟手尾，另外再要抽時間番大陸出差，假如我咁勁，捱到唔死得既話都唔駛係到做，搵份週圍飛既sales工就得啦。 最慘你肯捱，都只不過係遲d先炒，咁我唔等錢駛，無謂係度捱到五癆七傷先俾人趕走。於是我同我個組係名單個同事講，不如同佢對調，橫掂佢一定唔會要個乞兒offer，咁佢走我一定走，不如我走留番低佢啦，最少俾佢慢慢搵工。

依家遞左信成身輕哂，唔會再驚電話響，唸住暫時唔搵工，因為真係好厭倦個種生活，俾自己休息下，再唸下以後既路，現在先全職陪仔仔同兼職投資下股票。不過真係要學多d投資知識，而且要調整下自己，從一個九流工程師變成一個無固定收入既無業遊民。

睇相佬話過我今年一定變，而且會變好。雖然我不嬲唔理，不過依家中左上半，希望中埋下半

一位長期戰友

剛剛收到消息，一個共事多年既朋友今日就會離開公司。其實我朋友既功作能力超卓，比我呢個九流工程師有過之而無不及，一直得到各方讚賞。自從公司新領導層上場，剛復自用又領導無方，為保飯碗，只識處處欺壓下屬迎合上意。但我朋友個性比較剛直，多次提出意見，最後換來一個"不合作"為理由請佢離開，呢次擺明叫我地只能聽上司任何吩咐，不能有任何異議，否則則為"不合作"，但佢地d白痴決定既惡果往往由我們d低層承受。

同一時間，我看到一位過往身嬌肉貴既同事，由于某些原故，變成非常緊張份工，最近居然埋堆陪其他人食煙(佢自己唔食)。

我唔係想評論其他人既思行為，每個人都有自己難處同自由，只要唔影響其他人就無問題。
工作越耐，越明白"工作"係無用，你做十個鐘，都唔夠人地擦一個鐘頭鞋或者吹幾句有用，不過現實就係咁無奈。

其實點解我鍾意投資股票？因為無論長綫定短綫，賺定蝕，都係我自己能力做出既決定，我唔駛承受其他白痴既惡果，亦唔需要擦任何人鞋。

我希望有一日，股票投資可以令我離開呢種無奈既地方，最低限度可以令我有權力去孤芳獨賞。

市場不解之謎

看到互聯網討論區，好友佔左上風，有d野唔係好明。

自從踏入2007年，成交同指數都創新高，來來係一件好事，但近期雖然險守20000同10000，但成交顯著下降。股市上升其實係一個金字塔，假如大市要長期保持上升，必須要有新資金。理論上大市市值增加，投資者財富亦增加，假如投資者把財富留在市場進行買賣，大市成交就會增加而指數亦可以保持。而由于對市場樂觀，亦會吸引新的資金流入推高大市。現在指數重上高位，但成交減少，是否代表一部份資金已經離開股票市場？有人解釋係好多人仍在觀望，唔敢重新入市。但消失左二百億成交，代表唔單止一般散戶係場外，不過我都希望係呢個原因，假如係咁，即係有一批資金會係低位支持。

另外，近日有內地公司宣布發行A股，另H股大升，更令人不解，理論上公司有更多資金發展，乃屬好事，但成效要長期先可以見到。A股股價同H股股價掛鈎更加係廢話，一個封閉市場既供求同一個全開放市場係唔可以比較。反而因為內地資金從H股回流A股，發行A股會於短期不利H股，感覺有d似2000年科網，公司越蝕得多越升得快。

不過股市從來就係一個唔理性既地方，股票是人的遊戲，越多唔理性既新手，市場就越唔理性，越多我地唔明白既野…

主觀既信念

本人為銀英傳愛好者，偶爾會就所見所聞，想起楊元師既說話。近日見互聯網上，很多人都不停大叫升市，而且定立毫無事實根據既目標價，遇上不同意見即破口大駡。 令我想起楊元師幾既說話:

「 雖 然 你 有 思 想 上 的 自 由 ， 可 是 也 不 能 憑 自 己 的 主 觀 信 心 來 編 織 客 觀 的 結 果 啊 ！ 」

「 信 念 不 過 是 強 烈 的 願 望 而 已 ， 毫 無 客 觀 的 根 據 可 言 。 信 念 愈 強 ， 視 野 愈 小 ， 也 愈 無 法 正 確 的 判 斷 和 分 析 。 大 體 來 說 ， 信 念 是 一 個 可 恥 的 名 詞 ， 只 要 刊 載 在 字 典 上 就 夠 了 ， 並 不 用 嘴 說 說 的 。 」

「 擁 有 信 念 就 能 勝 利 的 話 ， 世 上 再 沒 有 比 這 更 輕 鬆 的 事 了 。 因 為 誰 都 想 要 獲 得 勝 利 呀 。 」

狼來了

從前有個師兄帶班羊去食草，點知有隻狼走出來，師兄(唔係千華)一面走一面大叫狼來了，咁d羊跟住走，點知有幾隻走唔到，閉目等死，點知隻狼唔食佢不等至，仲同佢講自己轉左食齋，仲帶佢地去一處好多草地方。咁d羊食完草返來，師兄同其他人好奇怪，問佢地點解返到家鄉，仲賺突左，一問之下，好多羊都後悔，但師兄同一d曾經逃離狼口或者俾狼咬過唔死得既羊，佢地唔信隻狼會轉性。

如是者，每一次師兄見到狼都仲叫狼來了，但每一次無走d羊都無事，而且肚滿腸肥返來，結果越來越少羊相信師兄，仲有羊d叫師兄唔好嘈。最後，連師兄都懷疑自己，結果靜靜雞跟住隻狼同d羊去左，發現個度真係有好多草。點知隻狼發現左佢，仲好熱情送招呼佢，讚佢係看羊界奇才，眾人皆醉佢獨醒，唔駛帶路都俾佢搵到呢個地方。

咁師兄好開心同其他師兄宣布:狼轉左食齋，世界已經冇危險，呢緊大把草食，牧羊業黃金時代到啦。。有d師兄聽到仲炒左牧場老板，自己帶一兩隻羊唸住做牧場大亨。
當各師兄帶住d羊好開心去到見到隻狼，隻狼又帶佢地去一個好多草地方，但去地方越來越遠。如是者好多次，d羊都食肥哂，d師兄都當隻狼係friend。
有一次，佢地又聯羣結隊去搵隻狼，隻狼帶佢地去一個地方，但個到無草，只有好多隻狼望住佢地。

無人知道發左咩野事，只知道過左好耐都無人再見過d師兄同肥羊。

開張大吉

受到二流程式員推介，我呢個無網絡既九流通訊工程師都試下寫BLOG。