再見2008

到左2008最後一日…

今年股市就唔駛多講…無網絡亦越做越縮。
今年除左奧運，真係好似無咩好野，難怪好似無咩人想懷念2008年。

希望大家明年會更好！

平安夜 XX夜

一年一度聖誕節，祝大家聖誕快樂！

以往平安夜，家長都認為係高危日子，古語有云:平安夜，失X夜！年青人往往會於係平安夜唔見左d野。家計會更會設立熱線幫助唔見左野又唔知點算的人！亦有無聊人嘗試計算n+10(月)係唔係出生率高峰期，不過時移勢易，連大陸都改革開放，香港就更開放，天天都可以係平安夜，隨時日光日白都可以平一平安！

本人有位band 5同學，多年前因為係平安夜揾唔到人"報平安"，所以走左去油麻地戲院睇左套荷里活經典戰爭巨著應下景，片名叫"平安夜，淫X夜"，正當片中各主角殺得性起，各觀眾熱血沸騰之際，走火通道個度門可能都頂唔順，突然自己打開左，門外街上人來人往，門內片中殺聲震天，門內門外相視而望，係個短短的幾十秒間，形成一幅有趣的畫面！

近兩年同呢位同學已經失去左聯絡，油麻地戲院亦已經執左，唔知我呢位同學今晚又會點樣過呢個平安夜？

公司煞星

上星期同位好耐無見的無網絡離職舊同事吹水，佢離開無網絡後到左另一間公司工作，現在生活不錯，可能公司個場俾佢踩旺左，公司發展亦越來越好開始，我地笑言佢工作運不錯，去到那裡工作都能帶旺公司。

反之我呢個九流人才就真係公司煞星，自我投身社會以來，去到邊間公司做，公司當時都係好好景，不過我入去後公司就會開始轉衰，人才一個接一個走，最後得返個爛攤子！係無網絡工作就更離奇，我係無網絡工作期間大部份時間負責新技術的project，雖然配合甚差，但全部都能準時完工！但最後都因各種古怪理由，無一個project可以接到生意。朋友都笑我還是保持現狀，別再打工去害其他工司，累更多人失業！

審判日將至…

唔知最後邊個會得救！

終於等到了…

城中偽才子尿震被揭發與城大北妹舌戰，終於同慳妹分手！

尿震呢個人持住老豆就扮才子招搖撞騙，當年本YES都唔知痛害幾多青少年，單係痛瘤明一事，已經知呢個係人渣，恭喜慳妹可以遠離此垃圾！

來自投行的聖誕卡(轉載)

Let's Sing together everybody~~~~



Latest Christmas carol for 2008..
You'd better watch out
You'd better not cry
You'd better keep cash
I'm telling you why:
Recession is coming to town.

It's hitting you once,
It's hitting you twice
It doesn't care if you've been careful and wise Recession is coming to town

It's worthless if you've got shares
It's worthless if you've got bonds
It's safe when you've got cash in hand
So keep cash for goodness sake, HEY

You'd better watch out
You'd better not cry
You'd better keep cash
I'm telling you why:
Recession is coming to town!

Finance products are confusing
Finance products are so vague
The banks make you bear the cost of risk So keep out for goodness sake, OH

You'd better watch out
You'd better not cry
You'd better keep cash
I'm telling you why:
Recession is coming to town

離別是为了相聚 II

今日收到風，無網絡終於再炒人，又有幾個同事要離開！剩下的同事已所剩無幾！

當日一氣之下離開無網絡，當時都有少少擔心，話哂本人無咩求生技能，但最後都行出一條新的路！

在此寄語要離開的同事，無需太擔心，呢個可能係一個俾自己踏出新一步的機會，新既生活同事物又會係前面，唔破舊又點立新！

離別是为了相聚，只要能相聚，無論多痛苦的離別都可以忍受。 (七武器—離別钩 古龍)

現時最熱門行業

最近經常收到呢類電話：

九：喂…
X ：你好，我地係XY信貸，依家有個短息貸款介紹…
九：唔駛啦，再見！

係金融海嘯下，百業蕭條，但反而係呢類公司發圍的機會！

早知唔生住…

迎接新生命的來臨，對父母來說本來是一件開心、溫馨的事。不過，一場金融海嘯卻令不少新任父母慨嘆「早知唔生住」。有調查指出，近三成新任父母表示若預知金融海嘯來臨，會改變生育計劃。有新任媽媽原本打算全職「湊女」，但因為丈夫工作朝不保夕，擔心「無錢買奶粉」，被迫重投社會工作。

身為人父，明白有細佬又無錢都幾頭痕…

我做黑社會的日子

今晚無故失眠，可能係見美股血流成河，再唸起下午係銀行見個班人…

講返d比較開心的事，係中學曾經發生的一件事。

時間：N年前(N係一個可以同時被2,3同4除盡的數，我的青春啊…)

人物 :

癲佬H…班主任，閒角一名
九流…班中絕對善良的好學生，喜歡幫助弱小
頂癮…班中美貌與智慧的化身，讀書運動兩皆精，深受班中萬千少女愛戴
無癮…班中品學兼優學生(不過光明的背後通常都唔太光明)，生得青靚白淨，可惜既生瑜何生亮，女fans俾頂癮搶哂
威哥…千企唔好俾佢個名嚇到，此人身形瘦弱，平日膽小如鼠，唯一興趣係乒乓球同練功(下邊分解)

地點：Band 5 中學的課室,當時班房內各人座位分佈如下：

黑板+癲佬H

威 無
九 頂

第一節：

癲佬H：依家秋高氣爽，正值郊遊的好季節，唐代詩人XX有云：…(省下數十字)，今年的班際旅行將於過兩日舉行，各同學請自行組隊，八人為一組。落堂！

小息：

九：喂，埋左班未…近近地就我地幾個(九、無、頂)，加路人甲、乙、丙、丁，搞掂啦！
頂：就咁啦，不過好似差個人，揾埋威哥啦，不過…你驚唔驚呀？
九：唔係啊嗎，驚咩啊……喂！威哥，咪走…喂仲走…咪走啊，我地差個人，入埋我地到啦！
威：入…入…好…好…啊…

旅行前一日，各人於座位上：

頂：九流，旅行燒野食要夾錢買野，你負責收錢啦！
九：喂，威哥，收錢啊，一人四草！

威哥聽到後表現得好驚訝…唔通佢以為學校包埋伙食？

無：係啊！威哥，收保護費啊！快d交錢！

此時威哥突然一聲不發把身子轉回黑板方向(座位分佈見地點介紹)

九(細語)：喂，威哥係唔係無錢(我地個代學生好多好窮…簡稱無金一代)，不如唔好收…頂癮你屋企有錢，你包底啦！
頂(更細語)：唔似啊！係唔係佢唔鐘意燒野食，淨係想試野外打乒乓波，唔好意思講啊！

三十秒後…威哥突然轉身，伸手交出四十大元，但用眼都睇到佢隻手係劇震，個樣好驚，一放低錢即刻以0.005秒速度轉返身！

到底有什麼令個名咁威的威哥變成咁樣？我同無、頂三人相視而望，大家唸唔唸到點解？

九：唔係真係以為收保護費啊嗎？
無：你死啦…
九：話收保護費個個係你！
無：但d錢依家係你張枱
頂：喂！咪玩住，威哥呢個人唔可以用常理去理解，話唔定…
九：點會啊。係都揾頂癮呢d打得的去收啦！我個樣似俾人收保護費多d！
無：層次唔同，頂癮似老板，你似跑腿！
九：你…
頂：無癮，你同威哥講聲係旅行費，唔怕一萬，至怕萬一！

頂癮不愧係智慧的化身，就係無癮好言同威哥講完幾句後，威哥個身影好明顯如釋重負，佢唔係真係以為善良的九流會收保護費啊嗎？

幸好頂癮救返九流一命，因為係旅行當日，我地見威哥係飯後坐於石上打坐練功，即係"如來神掌"中曹達華個種。假如威哥真係誤以為九流係黑社會，說不定九流早就死係如來神掌之下！

如果人生最壞只是死亡…

最近疏於時事，昨日經二流xx員(唔記得佢個新title中文名)告知，才知道有人因股票欠債，加上事業愛情兩失意，在家裡跟老人家一起為生命劃上句號！

我過去亦曾因投資失誤而令經濟走入困境，但只要勇於承擔，苦日子總會過去，我現在還不是有點閒錢在家裡睡午覺！我有朋友曾經跟破產擦身而過，呢兩年還經常接濟我這個失業中年，請我食左唔少好野！(特此鳴謝！)

人生難免會有不如意的事，其實只係一種試煉，為未來做得更好作準備…假如我以前無係股票市場悲哀過又捲土重來(再悲哀？)，我好肯定已經係今次金融海嘯中好悲哀的其中一個(最少遲過普通人悲哀)！我見過一生順風順水的人，稍為真正受到考驗時，已經完全無招架之力，大家都唔想臨老先咁啊嗎?

講俗多少…一個男人唔仆一兩次街，無幾條刀疤係生命的經歷，點玩浪子feel溝女啊！

假如各位係失意時有一絲輕生的意念，請花少少時間睇下一套舊片叫"新不了情"，劇中女主角到最後一刻雖然因病走完自己的生命，但一生樂觀的她到最後還希望身邊的人好好地活下去，以下是她對曾經放棄自己的男主角的最後說話：

「如果人生最壞只是死亡，生活中怎會有面對不了的困難！」

曾經…年少輕狂

今日又收到投訴，本網誌長期脫稿，最高紀錄二十幾日都唔見一篇文，於是急急再補多篇行貨填數！

今日下午百無聊賴，見天時凍凍地，行街好歡喜。於是出旺角懷舊下！

行經過母校，見門口結上彩帶，還以為是開放日，想入去行下，點知原來係唔知咩就職典禮，只招待貴賓。不過探頭一望，唔好講人面全非，桃花都已經變哂，經過幾次大裝修，現今的學校已經跟我們就讀時不一樣，但昔日的校園仍然留在我心中，當中包括了許多人和事，有機會跟大家分享！

跟住再到附近以前的活動範圍行下，變化反而不大，唸起好多當年的儍事都不禁會心微笑，好聽d叫年少輕狂，唔好聽就叫戇居，不過由於關係到其他人，所以不便公開！

難怪大家都說讀書時間係最開心…借用阿濃對青春的描述:

不用時光機，我也可以通過回憶，重溫青春，其中有笑有淚。青春啊，你使我心疼！

青春完，又做返中年量地官，最後行程又係到銀行打個轉，可能我去個間分行大，仍然有好多人，不過大部份都係木口木面…大部份股民的故事，都是以悲劇收場(輕則輸錢…重則…)，假如事不關己，我都有興趣睇下自己的結局係點樣！

重臨戰場

之前提過十一月可能會有一個反彈，看來已經出現並完成，希望各位已經抓住機會。

小心今次的主戰場會在國企！

讀書三部曲——點心集

有友人問我點解寫野會同普通人唔係太一樣，其實同我係成長中睇的書有關！其中可以分成三部份，今日先講第一部份！

我中學時學界仍然有一股閱讀風氣，當時最盛行的熱門小說叫衛斯理系列，連我間中學好多唔讀書的學生都鐘意睇！中一時因為某種原因而被罰買一本書帶回班中抽獎，我買左本衛斯理系列的"異寶"，根據過河抽下水的道理，唸住睇完再拿回校交數！
結果…我睇左兩頁就悶到被睡魔急call，翌日將本書原封不動交出抽獎！

(我後來都係同類抽獎中中獎，本書叫"會說話的洗衣機"。個位捐書的同學，你唔係玩野啊嗎？)

不過呢次經歷又唔算無得著，我發現學校附近有一間書店叫馬健記，又好多種類新書任睇，對我呢位窮學生係一個天大喜訊！

我特別喜歡其中有一個叫"阿濃"的作家，可能由於佢本身係一位老師，對年青人同學生比較了解，所以文筆淺白易明，但又言之有物，總好過衛斯理同你講外星人。阿濃寫的好多都係生活中的事，很容易就引起讀書共鳴，沒有長篇的大道理，但卻帶出各種小智慧，作品中充滿幽默又能夠流露溫馨的暖意，係當時係一種新的寫作手法。對於年輕的我，就好似有一個年長的朋友同你分享佢的生活、想法、價值觀。對於當時仍是一舊雲的我，某程度上有好大指引作用！

雖然阿濃有好多作品，不過我個人認為最好的是他最初的三本點心集，當年仲係暢銷榜的年度冠軍。唔知市面仲有無得賣(二十多年了…)。假如你有幸揾到，不妨花時間睇下，總好過浪費時間睇時下班"名人"出的垃圾書！

無網絡股票同好會

昨日友人向我投訴此網誌脫稿情況非常嚴重，有時一個月都無篇文，勢必令到讀者流失。順知我現在係大隱隱於樓(29樓)，生活仲平淡過樓下公園個阿伯，邊有咁多題材。今日試下寫返關於無網絡的事！

據舊工友回報，無網絡聽日又炒人，因為已經炒無可炒，聽聞好多老臣子都開始自危，不過佢地心態應該幾矛盾，依家炒就無份工，但可以攞足公司份退休金。若以後公司執笠，連份退休金都不保就損失慘重！

自去年股風盛行，無網絡有好多有識之士都揭竿起義，投身股海並組成"無網絡股票同好會"，旨在研究同分析股票，誓要係股壇揾返多少。各會員雖具有高等學歷，對投資技巧亦不乏精闢之見，對大市走勢亦有一針見血之分析，部份會員對匯市走勢更了然於胸，可惜遇上百年一遇的金融風暴，據聞戰績欠佳，只能嘆句：時不利兮騅不逝！

我前任上司摸頂王聽聞亦有跟隨各人南征北討，手執一把保你平安的中國製鋁質寶劍勇戰沙場，至今已身負重傷！

據聞會長身先士卒從三萬點一直勇戰到上個月才向各會員發出大撤退指令！慘烈情況可想而知！今日再遇上無網絡斷糧之險，確令人感到惋惜！

上一篇提過個位相士曾經同我地講，通常醫生、律師個堆專業人士，個個投資都搞到損手爛腳。其實我都知此言非虛，亦深明箇中原因，所以我一直立志做個唔專業人士！

一字寄之曰"變"

近日係網上見到有人用術數推測股市，暫時成績比沈大師好好多。講起玄學，本人亦遇過一個奇遇！

我自己從來無俾錢幫自己睇過相，但幾年前我陪朋友去睇相，個大師唔知係唔係想揾生意，免費增左我幾句。
佢睇睇我個相加個掌，就實牙實齒話我兩年後必定會自己轉工，佢話因為只睇相同掌，時間可能有少少誤差，總之一字寄之曰"變"，而且只會變得更好！你知睇相佬講野好少咁肯定無彎轉！但我當時係無網絡好食好住，加上我個人好聽d叫無野心，難聽d叫懶，真係做到退休都願。只有公司炒我，邊有可能我炒公司！唸住條友吹水搏生意所以語出驚人，我地仲笑呢次佢錯硬！

正所謂天有不測之風雲，後來個故仔大家都知，居然會係我自己辭職，生活變化仲係唸都未唸過，至於算唔算變好就見仁見智啦！

睢水大敗

呢兩日睇楚漢驕雄，有一段幾有意思…

話說韓信認為羽翼未成，堅抗伐楚。劉邦奪其兵權親帶六十萬盟軍，趁項羽率兵伐齊，進攻楚都彭城。

韓信一氣之下返鄉探親，路經劉邦起義的沛縣，發覺每家都有壯丁參軍，大家都認為劉邦必勝，門前都結紅布預祝勝利，有父母等兒子凱旋而歸，有小孩等父親回家。

韓信無奈跟隨從說：一個月後全沛縣家家都會結白布發喪！

結果劉邦六十萬盟軍，由於指揮混亂，面對項羽三萬精兵，於睢水大敗，幾乎全軍覆沒！

睇返呢兩年股市，是否有點似曾相識？

大鑊…我算唔算隱蔽中?

逾10年前的金融風暴，一班人被職場「淘汰」後，至今未能重投社會，成為「隱蔽成年」。基督教服務處剛於9月開辦「隱蔽成人上門輔導服務」，個多月便接獲50宗求助，有求助者更隱蔽了12年。

基督教服務處督導主任哈偉明指出，一個人若沒有上學、工作、接觸朋友、社會參與達6個月，便可被界定為隱蔽人士。

不過話說回來，隱蔽12年都餓唔死，家底都幾厚！

寒冬中…

今日真係好有97個種味道，雖然唔關我事，不過身邊朋友損手，社會經濟轉差，都覺得唔開心！
十一月可能有個意想不到反彈(希望啦)，到時坊間財演又會話見底、抵買！有貨的朋友可以想想呢個係唔係趁高減持的最後機會！

同步過冬

近日市場只能用慘不忍睹形容，年初所講的諸神的黃昏終於出現，其實我今年亦犯左幾次可以致命的錯誤，不過幸而及時紏正，但身家都唔見左兩成，不過已比好多投資者好，仍然可執行原本擬定的”冬眠+執骨” 計劃，但將來買貨的本錢當然就少了，但仍然在可以接受水平，在保本大前題下，都會唸辦法揾下錢！不過見身邊親人朋友在外匯同股票市場損手，自己卻愛莫能助，始終不是味道！

其實近呢幾個月不停見有人大打價值投資旗號去”低位” 買貨，我之前已指出唔可以用PE做指標，因為呢種時勢，今年唔知明年咩環境，PE根本上係廢指標，股息率亦唔可靠，原因同上。股票同做生意打工一樣，唔係認為正確就可以生存，係需要考慮環境，無網絡就係一個好例子，可必因為正確(某公式計出超值)而去買！我只能憑經驗講港股現價仍未真正見低，亦無邊隻實力股值得”執骨”！ 股市唔係一個只用數學就可以生存的地方，否則所有會計師同大學教授都唔會輸錢，假如有經歷97與2000的股民應該明白我所指何物！

我唔係話現價入市長揸係自取滅亡，不過熊市第一要條就係保本，做好友只要行錯半步就會粉身碎骨，與其冒險獲取最大利潤，不如放棄部份利潤，換取一個較安全的入市位！呢個牛市，我係牛二先開始入場，回報亦相當可觀！誰可以留著本錢捱過呢個漫長的冬天，誰就是最後勝利者！

當”股票” 好像從世上消失，個時先係最安全全力入貨時機，我從未見過一次股災會結束於仲有一大班人積極撈底作”價值投資”的時候。呢場係百年一見金融災難，但危永遠帶著機，處理得宜，亦係一個大到可以退休的機遇！

遠離戰場…去聽歌

近兩個月因為家裡有點事，遠離左戰場專心睇奧運同湊仔，好彩無揸貨，但亦失去做淡的時機！
今日如無意外雷曼應該宣布破產，金融界正式進入新的一個黑暗時代…

反正唔係戰場，講下其他，近日同友人傾下，本港樂壇好似多返人識唱歌，引得起我地班老餅聽歌，近期比較喜歡一個叫謝安琪的歌手，以下係兩首佢出名作品的MV

http://www.youtube.com/watch?v=Xc_kYHJoQsM

http://www.youtube.com/watch?v=hy2nnBU8Kuk

假股神再現…

自稱唔係股神的四叔今日又再發表對股市的看法…各股友自求多褔！

恆基地產(00012-HK)主席李兆基出席培華教育基金午餐\會後表示，美國經濟轉差，令恆指從高位回落，但現水平已相當吸引，估計再下跌機會不大。

他預期，港股於9月將有轉機，希望恆指下半年能重上25,000點水平，其中特別看好內地金融、地產、能源及一些國內大型龍頭H股。

他稱，短期內地宏調持續，加上內地通脹升温，因此短期該類股份將難以大升，不過待宏調放寬後，將會有利該股發展。

此外，他指出，世界環境及局勢混亂，美元有再次大幅下跌的可能性，因此可以看好金價。


大家假如心水清應該明白我所指何事！

好友移民…

無網絡的舊工友松青賢兄快將舉家移民楓葉國，在此祝願他在彼邦發展順利，有時間記得返香港揾我地班舊工友打波!

膠到用時方恨少…

【明報專訊】經歷了驚險萬分的120分鐘，曼聯 終繼1999年後再度稱霸歐聯 ，為慶祝愛隊以「雙冠王」為今季畫上完美句號，本地紅魔球迷網站manu.u-soccer.com特地於本周日舉行巴士勝利巡遊，暫定最多可招待90名球迷，路線將橫跨港島區及九龍半島。

http://www.youtube.com/watch?v=hLCAbEG4unU

http://hk.youtube.com/watch?v=z3v6zqAMpZA

http://hk.youtube.com/watch?v=kJr9TnLy938

http://www.youtube.com/watch?v=_eqMyV6oN38

http://www.youtube.com/watch?v=yjj1Vp04ph4&NR=1

遲d奧運…唔知會唔會有人攞住d膠獎牌週圍走！

眼睛紅了…

連日在電視看到四川災民的境況，最難過莫過於見到他們抱著親人屍首痛哭，有些母親抱著從學校掘出來孩子屍體痛哭，沒有當過人父母可能不知，那種感覺比自己死去還痛苦很多，是真正生不如死！我太太看到他們抱著屍體喊孩子，都在電視機前哭起來！

因為某些緣故，我和中國西南方的人有過些交情，也曾在他們家裡生活過！其實他們和我們沒有大分別，只是性格會比較單純率直一點，比很多香港人都可愛，對我來說，他們並不遙遠。現在看到他們流離失所、痛失至親，感覺好像見到朋友受苦，但又愛莫能助！

有時在想…天災難免…但偏偏就在這種偏遠又交通困難地方，就算想救援亦困難重重…他們生活本來就已經不容易，現在還要受這種苦…！

天災

四川發生大地震，死傷慘重，好多人仍然生死未卜，我當年旅行都曾經過地震附近的地方，地勢非常險要，令救災變得更困難，希望失散的人能早日團圓，失蹤的人能逢兇化吉！

從電視所見，學校整間倒塌，家長抱著已死去孩子呼天搶地，身為人父的我對此情景真係非常感觸！

又一次感到生命其實係非常無常，幾秒之間，生命就此消失，他們每個都是一條生命，和我們一樣…有著家庭、朋友、過去、理想！有時做人不用計較太多…追求太多…能夠於這分鐘跟家人、朋友一起…好好去享受這分鐘…已經是一種幸福！

混亂之治

最近大病一場…每天都由早睡到晚。同期投資亦沒有特別好成績，經常犯錯，可幸至今總結，今年成績仍為正數足夠開飯之用！

現今市場乃混亂之治…訊息很多但拿不出方向，所以還是看點書以靜心，安心養病！

誠意推介無線電視的"一百萬人的故事"…係近期難得一個有意義的節目！

聖火熄滅

剛剛睇新聞，聖火傳遞係巴黎因藏獨人士示威而需要暫時熄滅！

所謂藏獨，開始時只係一班係舊西藏政教合一時的已得利益者，例如奴隸主、大地主或者在位者，因為中國強迫西藏投降以統一全國，呢班人係解放後變得有名無實，於是企圖獨立再次走回農奴舊社會體制，失敗後就流亡國外，淪為外國針對中國工具！

本人係大陸工作過，印象中中國政府對西藏並唔差，當時我係天津工作，有中小學校專門為西藏人而設，我估西藏人寧願維持現狀，都唔想獨立後做返農奴！早前西藏暴亂的用意，基本上乃司馬昭之心，路人皆知。另西方一直流傳中國威脅論，西方傳媒同政府借此機會斷章取義扭曲事實，有部份外國人更因呢d傳媒誤導而支持呢班暴民！我真係唔明呢d所謂中立媒體、開明政府，將殺人放火者描寫成和平示威，保護市民捉拿兇手就係武力鎮壓！

今次係巴黎所發生的事，正好說明呢班人只係暴民同爛仔，藏獨同奧運根本無直接關係！以佢地邏輯推論，藏獨就可以殺人放火，到處明目張膽破壞，可能遲d見到國貨就燒都係理所當然！佢地為左自己利益，根本唔理其他人同事與事件有無關係，更唔會理其他無辜人士會受影響，只為一己私欲而為所欲為，正好露出呢班人真面目！

妖言惑眾…下集大結局

之前有一篇妖言惑眾…結果某二線股公佈業績…觸發二線股洗倉潮出現

希望個位仁兄唔好真係去炒業績…

無左旗幟一年

唔經唔覺，已經無旗幟左一年，剛好遇上港股過山車，可幸仍然有錢開飯，有些朋友頗羨慕我，唔駛返工又唔會餓死，雖然我唔駛再對住無網絡班高層，不過其實數字人生亦有其難處，有時覺得自己已墮落到每天跟惡魔打交道。

惡魔在那裡？惡魔就在每個人心裡！

假股神現身

宣 佈 退 出 「 股 神 」 行 列 的 李 兆 基 ， 農 曆 正 月 廿 九 日 （ 即 下 周 四 ） 是 他 的 八 十 大 壽 ， 這 名 「 退 任 股 神 」 昨 日 被 問 到 有 甚 麼 生 日 願 望 時 說 ： 「 生 指 數 升 番 上 三 萬 點 ， 咁 就 人 人 都 歡 喜 。 」

四 叔 又 說 ， 港 股 早 前 已 跌 得 過 度 ， 相 信 未 來 有 望 慢 慢 回 升 ， 春 天 期 間 ， 有 望 反 彈 至 二 萬 七 千 點 。 他 說 ： 「 春 天 ： 農 曆 一 、 二 、 三 月 ， 今 天 一 月 都 未 過 ， 還 有 兩 個 月 ， 我 希 望 有 二 萬 七 千 點 ， 最 後 去 到 三 萬 。 」 四 叔 續 說 ， 秋 天 是 淡 月 ， 這 三 個 月 或 看 淡 ， 投 資 策 略 是 宜 守 不 宜 攻 。

妖言惑眾

我一向都知網上意見百花齊放…不過今日見呢個扮專家post真係有點火

http://www.discuss.com.hk/viewthread.php?tid=6512824&extra=&page=1



恆生指數高低是代表著成份股的實際業績和盈利，高指數必須有公司的高盈利和業績來支持。<~~~呢個就係股價既真正意義
而股價亦代表著投資者對公司未來前境既預期<~~呢個係股價既錯覺

連白痴都知股價其中主要成份係對公司未來盈利能力預測，07年10月時過份樂觀，結果市場隨後因對未來睇法轉變而急轉直下，不過就咁認為股價代表著投資者對公司未來前境既預期係股價既錯覺，咁就錯上加錯！股價既真正意義係公司現有價值加上未來盈利能力預測，正因為未來多變，而且人對市場反應不一，咁先會造成股價波動！好多新興行業同市場都無高盈利和業績來支持，難到投資係呢方面就係錯？

我出post只係想提醒大家市場係通常係由投資者情緒主導，而情緒高低起落時股價會呈現超買同超賣既形態，而當投資者情緒使股價呈超現超賣既形態時如果可以配合到股價既意義(即係公司有盈利增長配合股價升幅)，咁樣既心態去買股票你如果都要輸既請放心喎因為輸得比你多既人仲多而今時今日大部份既股價己經出現呢個情況，但適逢各大籃籌股下個月派成績表後發覺07年全年業績增長強勁加上奧運將近(估計6月前到時投資情緒又會高漲)而係呢個時間入唔入市當然係你自已決定啦贏同輸係你既

講左咁多似是而非廢話…即係暗示市場係通常係由投資者情緒主導…依家好超賣，不過事實係市場最後都會跟實況走，成個分析重點係…以現價相對07年全年業績…算唔算超賣？
文章內無分析過，相信只係筆者自己覺得超賣，點解？因為好多人比佢買得貴。假如有留意市場，好多實力股現價仍然比07年頭高一倍以上，唔單止反映完07年全年業績，仲加上對公司未來盈利能力預測，最近有數隻國企宣佈去季業績強勁，但對股價毫無幫助…大家唸下係唔係投資者情緒咁簡單？投資者情緒可以影響市場，不過唔係惡哂，而且請唸下投資者情緒點解會變！

仲有，比別人輸得少，唔代表唔輸，別人輸幾多唔關我事，本人從來唔打明知會輸既仗！

當然，作為長線投資，唔理股價波幅係應該…不過真正玩價值投資…就應該從股票合理價（現價值加未來）研究，唔係睇人超買定超賣，咩野投資者情緒，人地輸定自己贏！呢篇文章用投機心態作投資分析，係起步點已經錯哂！扮專家用似是而非道理講一大堆廢話然後就話依家抵啊…買啦…簡直係妖言惑眾！

唔記得提大家，好多蟹民係個post內大力支持…仲有好多搞笑理論…無事做可以睇來笑下！

真股神現身

昨晚真股神畢菲特(四叔話)出手8000億美元救債保商…市場反應正面…

不過其實佢似趁火打劫多d…諸神的黃昏又近一步…

開工利是

今天看到書櫃內貼著三張多年前的開工利是…
自從投看社會…年年都有開工利是…今年無(失左)業……開始懷念開工利是…

當你擁有時，你未必會珍惜。當你無法再獲得時…你只可以懷念……

大家再唔好埋怨開工利是太少了…總比我什麼都沒有強…

新年快樂

祝各位鼠年大吉大利

單身既巧遇桃花…佳偶天成
拍拖既愛得火熱…共諧連理
已婚既夫妻恩愛…心想事成
炒股既逢買必中…一本萬利
工作既有薪無勞…坐享其成
讀書既年年高中…名列前茅

等待黃昏

昨日將前陣子的入貨沽清…蝕左！
依家買少少認沽再靜候諸神的黃昏…

等待期間…俾小弟最近拙作大家笑下

原來我係主角……

琴晚美國絕地反擊，有高手指出乃轉勢，為求自保，今朝將手頭沽輪賣返哂俾輪商，圖個小利。

今日事忙，假如真的轉勢，再等機會買金融同煤炭股…

*以上純粹個人亂吹分析，你信我就係你自己問題

諸神的黃昏

昨日全球股市災難性下跌，美國突然減息四分三厘力挽狂瀾，今日港股帶點瘋狂地破紀錄反彈。

今日出外與舊友聚餐，午後到銀行所見，散戶正如任總所言，由極度恐慌變成極度貪婪，兩日之內遊遍天堂地獄。

一位高人曾教于小弟，要認清勢而不為像所惑，今天可能只是另一個更大悲劇的序幕，不過唔知呢個劇主角係買左認沽輪的我，還是今天這一班遊客！

(假如主角唔係我，2008年單日最大跌幅可能比今日升幅更大)

*以上純粹個人亂吹分析，你信我就係你自己問題

全球股災

「 到 底 說 來 ， 期 待 他 人 墮 落 的 作 法 ， 不 管 怎 麼 看 都 是 卑 鄙 下 流 的 。 最 後 其 實 也 就 是 利 用 他 人 的 不 幸 啊 ！ 」

--- 楊元帥 銀河英雄傳說

不良嗜好

自從火燒連環船事件後，除左手持一隻遠期價內認沽輪外，已再無涉足市場，正是無所事事。
前一陣子整天在二流程式員家中打機，其中一隻遊戲係關於高達系列，基本上一個七十年代或以後出世男人都會知道！

關於高達，最近我染上一種不良又敗家興趣——砌模型！事緣有日經過淘大商場，正值高達模型做大傾銷，結果我呢個老高達病態購物症發作，買左十幾盒BB戰士(大模型砌好屋企無位放)…結果…

圖中個百式係我係無網絡第一次出差去台灣時係西門町買，結果一直在家封塵！本著有始有終兼無所事事，於是花左兩晚把模型砌好。呢個係我最近第十幾個制成品！

今晚砌緊東方不敗…加上神高達…遲下做個東方不敗流派師徒對決場境(唔好意思…可能大家唔知我講咩)

我又老左…

經過昨日，我又老左一歲
可惜時間只會製造老人…唔會制造聖人

希望唔會越來越笨就好了！