消失的小學…

我星期日睇報紙，我以前間小學因為收生不足，宣佈停辦！又可以講下歷史！

本人當年小二由木屋仔成功上樓變成屋邨仔，所以需要轉校。當時我母親帶住我同哥哥到處搵學校，據聞曾經有一間名校收我個天才兒童既阿哥，不過就唔收我，結果我阿媽迫住要我阿哥陪我讀呢間平民小學(好彩佢最後做到band 1仔，唔係肯定怨我一世)。

其實當年仲細，所以無咩特別記憶，我小學時比較孤僻，亦無咩朋友。我阿哥就全級考第三，係典型模範學生，我就全級考百三，係典型無前途學生，記得我經常會唔交功課，代價就係要係禮堂留堂做完先走得，所以坐得係個度，都唔好得去邊。由於我阿哥每日要等我放學一齊返屋企，所以佢一定要坐係禮堂等我做完功課先可以一齊走！每次有老師經過見到我阿哥係到，都會以不可能既表情問呢位品學兼優模範生點解會留堂，答案當然係佢個累家坊細佬！

其實小學生活都幾平淡，除左每日無心向學上堂瞓下覺，正所謂文又唔得，武又唔得，好學生又做唔到，壞學生又唔敢做，始終唔及中學生活多姿多彩，話哂我中學都做過全班第三，又代表過班足球隊(做龍門)，算係威過下！