中學的第一天

基於某讀者投訴筆者太懶，為免流失最後一位支持者！決定寫一篇作品！由於最近"生活淡淡似是湖水"，亦無興趣寫有關股票之事，所以繼續講下歷史！

各中小學已開學一個星期，就講下我中學的第一天！

第一日返學，由母親大人護送，可能旺角真係太遠，佢都唔係太識路，結果坐左一架"觀光型"巴士，遊遍大半個東九龍先駛出旺角，由於早左成個鐘出門，幸好未有遲到！初到貴境，先來一個鐘晨早週會，當年係無人講人道和平等，二千個學生係烈日當空下企足一個鐘，全體老師即安坐涼亭樹底下！有一次某老師講左一句："今日都唔係太熱！"，幾乎引起史上第一次學生暴動！後來由於有大量學生試圖以遲到逃避週會，週會由最初每星期定時舉行，變成一週內不定時突擊舉行！

早會開始時，全體會被迫大合唱校歌，不過由一班睡眼惺忪又企到腳軟的同學唱出，簡直係一首喃嘸哀歌，當時校舍隣近火車站天橋，每次都有不少上班人士目睹慘況！本校校歌乃全國語版(最奇係某不懂國語之音樂教師能指出有人發音不正)，本人乃新派國語奇才，到今時今日都唔知首校歌講咩，只知道每次唱學生自創廣東話版(同音)，有機會揾俾大家分享！

第一次週會內容係有關會考合格率及壞份子，係中學派位篇已提及，不作重覆！

週會後終於可以返課室，當時本校中一至中三各設十班(係今日一片殺校潮中，當時盛況真係有點不可思議)，以A至J命名！本人被派班別為H！由於人生路不熟，即時揾個有利位置，再同附近其他人吹下水！當老師入到課室講完廢話(自我介紹，叫你聽日記得帶咩，最緊要係錢)，開始點名，怪事就發生啦！

班主任：仲有邊位未點名？
迷惑的我：我啊！
班主任：你出來，睇下係唔係寫錯名！(因為學校質數，有部份人會另外揾學校而唔報到)
疑惑的我：我叫XXX，有無啊？
班主任：奇怪！無你個名，有幾個似，不過都已過報到左，唔會係你！

唔通教育史上奇蹟出現，教育處係中學派位搞錯左，我可以離開呢間band 5中學！事件就咁擾攘左好耐，最後班主任可能開始懷疑係我問題！

班主任：呢位同學，請攞出你張編班通知書！

為表清白，我攞出左張編班通知書俾佢睇！張編班通知書確係H,大家都唔明點解無我名！奇蹟離我越來越近！再過左一陣，班主任終於唸出呢個答案！

班主任：呢位同學，可能張紙寫你係編去A班！
憤怒的我：我讀得書少，你唔好呃我，A字係連口，呢個字係開口，雖然有點向內，點會唔係H！(希望大家明我講咩)

班主任已經唸唔到其他可能，為求放學，無可奈何對我下逐客令！到左A班，大家已經準備放學！我終於見到自己個名，見微知著，大家從一張紙就可以睇出呢間接係咩野學校！由於全班滿座，我只可以坐係班房最後個角落！對於有近視的我，基本上睇唔到黑板寫咩！由於呢個原因，我母親終於肯帶我去配眼鏡！(佢一向認為此非近視，乃睡眠不足引致之濕熱的眼膠所致)