馬會信徒

前兩日同屋企人去美心食早餐，當時大排長龍，我前邊有個中年男士！

買飛職員：先生，加唔加通粉？
男：仲加！條隊咁長有排等！(條龍長關個買飛咩事，攞人出氣！)

排隊攞食物中…

男：xx啊！琴晚場波無買雲達不來梅！
…
男：我琴晚場波無做功課，買漏凱沙羅頓！我屋企儲左幾年報紙，查返戰績就買得中！
…(幾年！踢個班人都唔同啦！)
男：我琴日無用條主客和公式，輸左四百！
…(有公式，馬會仲駛開！)

佢全場語氣都係相當唔抵個種，好似d錢原本係佢，只不過因為xyz，所以無左！最攞命佢係傾賭波必勝法途中，無所事事把玩餐具，但個套餐具係我個盤！最後我忍唔住同佢講，呢個盤唔係佢，唔該唔好摸d餐具(佢隻手隨時掂完馬經)！

賭波細細地就無所謂，可以增加睇波氣氛，大不了當買六合彩！不過呢位波神好似已經超出呢個境界！其實我以前好多band 5同學都係賭徒！個d理論仲勁過呢位波神好多！最後我無聽過有一個真係埋數贏到錢！

不過佢地年紀大左，好多都覺悟無進一步沉迷！至於呢位波神，可能要繼續做信徒進貢！