神奇班主任(上)

我以前提過我中學班主任對我影響好深，佢亦可以算係平凡人中一個奇人！由於篇幅太長，而上下集方式刊登！

話說我地一班人經歷最後一次中三淘汰試，有幸升到原校中四，但開課首日有一個肥佬走入班房做班主任，此人教學水平之低，若然由此人教足兩年，大家會考一定"肥佬"！好彩佢只係代課，正式班主任由於踢波整跛左隻腳，入廠休息請假一個月！正當大家對肥佬教學非常失望，上左一個月數學堂完全無人知佢講咩，幾乎要揭竿起義！正式班主任終於返工啦！

我習慣叫班主任做癲佬H，以下簡稱佢為H。

H君年約四十，戴一副大四方框眼鏡，由於思考太多數學難題，髮線嚴重後移，假如佢著件背心拿把菜刀，大叫有殺無賠，保證神似過癲佬正傳個秦沛！我最初真係有懷疑佢係癲佬，因為佢同我十幾年來所遇老師完全唔同！當然佢教得好(以肥佬作比較)，不過佢往往有神來之筆，令全班人捧腹大笑！

佢習慣話大家做錯呢題就會得零蛋分，我到今時今日都叫0分做零蛋分，就係習染佢說話習慣！

中華英雄有個華英雄劍掌雙絕，我地班主任就係詩數雙絕，佢係教數學途中，能隨意背出一首詩，而詩意絕對言之有物，首詩當然亦唔係街邊行貨個種！(最少我未聽過)

佢對中西歷史之認識，亦唔似一個數學佬應有，佢可以講講下微積分，同你講下人生高低同唐朝安史之亂！至於數學史，佢經常興奮過度講解世界最有名個幾條數學難題，我地當然唔知佢講咩，淨係知破到一題獎金都夠退休！

成日上堂講第二樣野:

例如佢入廠期間隔離床個人醫左四十幾萬找數，叫大家儲錢以放萬一！

我記得有次佢講起講會考監堂，有某七彩頭少女到場後一直睡覺，夠鐘就交白卷，當大家正在大笑，佢突然間好認真咁講：唔好笑佢，佢隨時賺得多過我！

當用撲克講解機會率，唔知邊個儍學生真係帶副撲克返學校俾人捉到，搞到佢俾人煩(通常煩唔到佢又唔係殺人放火，佢都係閒事莫管)，結果佢好認真咁同全班講:"係我手係教具，係你手就係賭具！"(有一次假期，我見佢約左三個老師拿住某種"教具"急忙離開學校開"教局")

有一次某學生將帛金回禮信封放係老師桌面，當佢上堂行入來，一見信封，即刻不加思考將佢交俾最近個女學生，然後同佢講：你漏左野！

試問有邊個老師會將咁重要又殘酷既真理話俾一班天真無邪既學生知道，令我地唔駛再花時間自己去領悟，與君一席話，勝領幾次野(鑊)！

總之上佢堂係一種娛樂，亦係一種期待，你永遠估唔到佢突然間會做咩，就好似你買飛睇周星馳電影，你唔會估到係咩，但包你拍掌叫好！

由於佢上堂舉止與別不同，我成日覺得佢癲癲地，不過林子祥首真的漢子都有唱："豪傑也許本瘋子！"

當我地同班主任熟稔，開始搏得佢歡心，佢難得到將佢過去講俾我地聽………