(轉載)失敗的原因

這個佔中…又命遮打革命，應該係本世界最奇特的學運，由一班充滿熱誠、理想、仲思想好單純(唔好聽叫蠢)的人進行………

學生的訴求，大家係理解
學生的熱情，大家係唔會否定
追求普選，應該無人會反對

但問題係呢班以為自己有獨立思想的人，天真地踩入陷阱，用最錯的方法去爭取！

 呢個運動的目的，係阻塞交通，癱瘓香港經濟迫使中央政府給予香港人真正的特首選舉制度。你無聽錯，係用香港經濟要脅北京，你插自己兩刀要我就範？你係唔係食錯藥？

可能連搞手都覺得有d問題，於是後來變成要脅香港政府向中央爭取真普選。香港政府打俾北京：「老闆，我管唔掂班市民，你放權俾佢地自己選特首。」，假如北京肯答應，就肯定係北京食錯藥。

 一開始時，就盛世凌人，一副綁匪唔答應我就撕票的模樣，限政府幾點鐘要回應…否則…！你見過有差人同受害家屬講：「你交屬贖金，我驚佢地會撕票」？ 連白痴都知，我今日答應左你，你大哥明天心情唔好可能又來馬路行下，下次可能係要求共產黨下台！

北京唔理你、香港政府唔理你，無人肯交贖金，仲同你講慢慢養住條肉參，你急我唔急，咁點算？沖擊解放軍？你講笑，佢地唔同任你打任你駡的警犬，會死人的！

唔緊要，我地可以叫國內蝗…sorry係同胞支援我地，十幾億人向暴政說不！一直唔過深圳河的高尚港人，到呢刻先發現國內同胞覺得香港人自命清高歧視佢地，一早已經恨不得你死，依家十幾億人齊齊買定花生睇住你幾時撕票！

唔緊要，我地有山姆叔叔，咩野國際標準都係佢定，一於叫佢主持公義。點解美國求其吹兩句水就算？梗係啦！人地唸住係六四翻版，點知又無解放軍，又無坦克車，搞咁多野得幾十個摧淚彈，佢班警察對住個兩手空空遮都無把的黑人都開六槍，佢點好意思大聲話香港警察暴力！

我地仲有國際社會輿論。哇！你係唔係靠害，好改唔改幫我地改個命做遮打革命，阿爺咩都唔怕，最怕係革命，你分明擺我上台！

咩都無，唔緊要，我地仲有香港市民，七百萬人一條心！一於遍地開花，迫到政府就範！ 呢個行動本身就係以破壞香港人的經濟做籌碼，你叫班俾你破壞緊的香港人去支持你？無問題，我地係幫佢地爭取香港的未來，脫離大陸的魔掌，佢地只係犧牲少少就可以換到光明的未來，佢地無理由唔支持我地！

陳生係一個導遊，因為佔中無哂國內旅行團，已經幾日無工開，但佢相信呢班學生講，要爭取就要犧牲，佢願意勒緊褲頭犧牲自己為下一代爭取！

為左支持學生，佢每日都有留意佔中新聞，班學生真係好有紀律，又自發性幫忙，陳生覺得香港未來係有希望，自己犧牲係值得！

但佢又發覺班學生坐係到上下網吹下水發表下意見，寫下標語，好似好輕鬆，佢地到低唸住下一步點做，唔會真係就咁一直坐落去？學生有源源不絕的物資，捱到2046都無問題，但陳生屋企下個月交租都有多少問題！

佢又發現，點解電視見金鐘日頭同夜晚佔中人數差咁遠？原來好多人都係白天到此一遊，夜晚返屋企。我賠上身家財產去犧牲，下個月可能屋都無得住，你地當來景點參觀，然後返屋企高床軟枕？

又一晚，佢見到電視前好感人場面，大家開住手機，閃亮地唱海闊天空，但陳生一d都唔感動，佢犧牲自己，就為左俾班人去開演唱會，個一刻佢想送呢班人去見黃家駒！

陳生同自己講，事情唔係咁，決定去金鐘一次，佢發現原來好多人係返緊工出緊糧，只係放工放假去金鐘打下卡，影下相上facebook搏like！

台上有個學生仲講緊爭取係有代價，犧牲少少係在所難免！

陳生轉頭就離開，一邊行一邊唸：「犧牲係在所難免，但點解由頭到尾得我一個犧牲，呢班人到倒犧牲左d咩野？假如我仲支持佢地，我就要睇精神料食藥！」

為左確保下個月有錢交租，陳生成為佢個區的驅黃行動中堅份子！

遮打革命……革命唔係請客食飯，革命係需要流血，首先係自己的血，唔係人地的血。連呢個覺悟都無，大家認為有可能成功？

每一場運動開始，都係先犧牲自己，用自己無私奉獻去感染其他人參加，先有可能成功。
我地呢場鬧劇，一開始就唸住犧牲別人，自己零成本去抗爭，我地應該點去形容？