佔中事件薄

笑就講完…佔中第十日，係時候作中期檢討…

剛開始，學生係拿住絕世靚牌:
純高理想，令人敬佩
學生純真同熱誠，令人同情
加上第一日政府係鐘頭前放催淚彈(唔理係咪有人衝擊警方，鏡頭前睇唔到)
大量剪片睇住警察對付手無吋鐵熱愛和平的無辜市民，邊個有心人剪大家心中有數！

站係完全道德高地，佢副牌仲靚過八九民運，政府真係輸少當贏，當時佢地識見好就收，退去維園靜坐，應該已經贏硬！

點知佢地真係無智慧，信三妖理論自發佔中，人地係做個樣吹水嚇政府，你地班天真嬌就當絕世好橋，仲意氣風發，開始失控，港孩特質表露無遺！態度突然變強硬，命令689幾點前下台，佢真係以為689係佢屋企菲傭，當年五十萬人上街，老董都唔係立即落台！你唔係向北京告狀，係命令北京做野，就算當北京真係怕左你，你叫人點係十三億人面前點落台！

而且時間耐左，好多剪片都俾人踢爆原來唔係個回事，大家對手無吋鐵呢個詞開始懷疑，最少已經唔係一面倒！

無論佔中，佔鐘都好，始終個區個個身驕肉貴怕左你，班人衰心急無腦，玩遍地開花，仲係最多基層同九龍要脈旺角！你要對付政府同權貴，就要利用基層群眾力量，你班白痴走去搞最多基層地方，人地點會支持你！689真係多謝你都趕唔切，你可以恨共產黨，但人地起家手法高明過你地多多聲！

當時就算受影響或者覺得學生過份左，始終好多人未燒到埋身或者唔係好傷，對呢班站係道德高地的佔中友敢怒不敢言。

當時發生左三件事：

元朗驅黃成功，班白痴唔明白新界人同港島人係完全唔同，佢地齊心同排外係你永遠估計唔到，你班後生讀得書少，當年英國接收新界時，佢地連鬼佬洋槍都唔怕。你去惹呢班土皇帝，同自殺無分別。有d野大家都唔敢做，只要有第一個人成功，其他人就唔會怕，紛紛站出來，大家都怕成為下一個旺角，於是好多區都傳來驅黃成功消息！

圍堵政總，一班無腦又不受控的人活生生顯現係鏡頭前，佢地係有幾惡，惡到可以截救護車檢查，警察有無食飯要佢批准，唔俾阿婆返工，成個佔中形象輸哂，大家係同情學生，唔係同情黑社會！鏡頭前，話事人講，呢個係我地決定。大家心入邊想，假如佢地呢班惡人成功，咩都要跟佢地決定，我地仲無自由過現在，佢地真係追求緊民主自由？

喜記老闆非禮事件，亦係最重要一件，只能怪佔中信錯人，最初佢地用非禮事件抹黑反佔中人士，想利用女性弱者身份再制造同情，點知段原片俾人爆出來，班學生阻住人仲一點歉意都無，一臉惡霸欺侮弱小模樣，一向學生形象蕩然無全，而且鏡頭前所見，鬧佢地個班都無可能係新移民、大陸人或者黑社會，而且重係一班英語流利的知識份子，絕對唔係旺角無知阿伯。咁等於正式同全世界講，你唔係唯一，其實好多市民都同你一樣，想鬧呢班佔中者好耐，佢地所鬧正係好多人心聲。大家都唔再怕講出來！最重要係大家認同一個老闆係無能收幾百蚊去做臨記，佢成功將自己定為成一個要養家的弱者，卑微地求過路，最後走投無路絕望衝向示威者，將對方推向蠻不講理只顧自己的自私者方向！而一險天真女示威者竟然扮可憐屈佢非禮。

睇到呢到，任何中立的人都唔會再支持學生，原來一直被同情的學生只係扮可憐，真正可憐係受佢地影響的人。連帶呢班學生人格都受質疑，變成過街…

好老實，我個人有懷疑呢件事係有預謀去扭轉民間同情牌，但就算係，都只怪你蠢俾人睇中你弱點先會中計，你真係關心市民，人地設咩野局都無用，人地只係俾機會你將你地港孩特質展露係世人面前。呢d就係政治。

佔中民望(除左班洗左腦)已經跌到谷底…好多政棍都開始同佢地劃清界線自保，待我們看看最後結局…